2017-02-06

ЭКСКЛЮЗИВ: Өймөкөөҥҥө аны бэлэсипиэт рекорда туруоҕа!

Просмотров: 496

velik

 

Польша велосипедист- экстремал туристара күөрэйэн таҕыстылар. Бэлэсипиэттээх кытай туриһа Ча Эрдаан Өймөкөөҥҥө салгыы айанныыртан аккаастанан төннүбүтүн кэнн, уоскуйа быһыытыйбыппыт кэннэ, аны поляктар соцситимнэри бараатылар. Уолаттар Тымныы полюһугар Өймөкөөҥҥө Гиннесс рекордун олохтуу баран иһэллэр.

 

Сайдыылаах Европа спортсменнара диэх курдук, олох эрдэттэн бэлэмнэммиттэр. Кытай туриһын курдук, “Халыма” трассатын устун балааккаҕа хоно-хоно, айанныыр санаалара суох. Сарсын сарсыарда эрдэ, билигин түһэ сытар “Триумф” гостиницаларыттан таксиига олорон, таһаҕастарын тиэммитинэн Өймөкөөннүөхтэрэ. Велосипедист-экстремал Валериан Романовскай хамаанда хомунан кэлбит. Ол курдук, Вавжинец Куц уонна Вацлаб Лаба былырыын баччаларга Москваттан Ямалга диэри массыынанан айаны тэрийбиттэр эбит. Быйыл, Валериан Романовскай рекорд олохтоору сылдьарын истэн, бу суолталаах тэрээһиҥҥэ кытыннарарыгар көрдөспүттэр. Экстремал-спортсмен 15 сыл устата доҕордоспут табаарыстарын этиилэрин үөрүүнэн ылыммыт. Салгыы Вавжинец Куцтуун маннык кэпсэттибит:

 

— Мин уонна Вацлаб Лаба Валериаҥҥа Гиннес рекордун олохтууругар көмөлөһүөхпүт. Ол курдук, экстремал-велосипедист туохха да, кимҥэ да арылдьыйбакка эрэ, соҕотоҕун 2-3 км сири 48 чаас устата тохтообокко төгүрүйүөҕэ.

 

— Уоаай, утуйбакка-аһаабакка дуо?

— Түүннэри-күнүстэри. Аһыырыгар эрэ тохтоон ылыаҕа, ол эрээри 48 чааһын син биир ситиһиэҕэ. Сылаас аһын биһиги хааччыйыахпыт.

 

— Туох сиргэ бэлэсипиэтинэн сүүрдүөҕэй?

— Массыына трассатынан сүүрдүө суоҕа. Нэһилиэк иһинээҕи суоллары булуохпут.

 

… Мин айанньыттары кытта сарсын сарсыарда айанныахтарын иннинэ 8 ч. көрсүөх буолан болдьоһон, кэпсэтиибин түмүктээтим.

 

Онтон омуктары көрсөр Тамара Васильеваҕа Өймөкөөҥҥө эрийэн кэпсэттим:

 

— Эһиэхэ аны Польша экстремал-велосипедиһа иһэр дии. Билэҕин дуо?

— Билэн. Күүтэн олоробун. Олохтоох дьаһалта бүгүн сэрэппитэ. Манна Италия Венециятыттан эмиэ биир бэлэсипиэттээх киһи Гиннес рекордун олохтуу сылдьар ээ.

 

— Бэлисипиэттээх киһи даа? Италияттан даа? Тыый, омуктарбыт туох ааттаах бэлэсипиэтинэн туруммуттарай бу?

— Бэҕэһээ кэлбитэ. Икки чаас тахсан сүүрдэн кэлэр. “Анал балаһыанньалаахпын”, —диир. Куораттан биир ханнык эрэ турфирманы кытта сибээстэһэн кэлбит этэ. Икки сибидиэтэллээх буолуохтаах үһү. Ол дьон илии баттыахтаахтар эбит. Миигин: “Илии баттаар”, — диэбитэ да, инниккэ киирсибэппин, тоҕо төбөбүн ууран биэриэхтээхпиний? Итинтиҥ улахан эппиэтинэс буоллаҕа дии. Дьиэттэн тахсан барар да, ханна сылдьарын билбэппин. Баҕар, сылаас хонтуораҕа киирэн олороро буолуо дии.

 

Билигин аны французтар кэлиэхтээхтэр. Ону кэтэһэ олоробун.

 

— Эмиэ бэлэсипиэттээх рекорд олохтооччулар дуо?

— Ээ, ол көннөрү туристар.

 

— Оччоҕо сарсыҥҥыттан Италия, Франция, Польша дьонун мунньар эбиккин дии.

— Бу диэн аҕыйах. Ааспыт нэдиэлэҕэ сэттэ омук сириттэн мустан олорбуппут. Норуоттар доҕордоһуулара диэн онно баар. Бары мустан чэйдээтэхпитинэ, дьэ, көр буолар –- илиинэн далбааттаһыы бөҕө. Нууччалыы эттэххэ, “язык жестов”. Үгүстэрэ английскайдыы билбэттэр. Тымныы полюһун көрөөрү санаалара уонна баҕалара оннук күүстээх.

 

… Оттон бу күннэргэ Өймөкөөҥҥө — 67 кыраадыска тиийэ тымныйан баран, бүгүн ону мэлдьэспиттии, күнүн көрөн, 30-тан тахса кыраадыс тымныы буолан турар үһү. Онон Гиннес рекорда олохтоноро олохтоммото биллибэт. Чэ, көрүөхпүт. Салгыы хайдах буоларын кэтиэхпит.

 

Елена ПОТОЦКАЯ, «Саха сирэ» хаһыат, www.edersaas.ru

Поделиться

Переход на предыдущую и следующую статью