Бу күннэргэ култуура үлэһиттэрин сыл аайы ыытыллар Спартакиадалара саҕаланна. Бүгүн бастакы түһүмэх – хабылык уонна хаамыска күрэхтэһиитэ буолла.

 

Варвара Михайлова, култуура үлэһиттэрин идэлээх сойуустарын бэрэссэдээтэлин солбуйааччы:

— Быйыл култуура уонна иһитиннэрэр-биллэрэр эйгэ үлэһиттэрин 17-с Спартакиадатын ыытабыт. Бастакы түһүмэх – хабылык уонна хаамыска. Манна 45 тэрилтэ сайаапка биэрбититтэн 40 хамаанда кыттыыны ылла. Биллэн турар, атын түһүмэхтэри эбэн, уопсай түмүгү таһаарыыга бүгүн кыттыбатах хамаандалар “оҕустараллара” чахчы.

 

Кыттааччылар хамаандаларын сүүмэрдиирбитигэр тэрилтэ үлэһитин ахсаанынан анал бөлөхтөргө араарабыт. Ол иһин судьуйалар хамаандалары үс бөлөххө арааран күрэхтэһиини дьүүллүүллэр: элбэх ахсааннаах киһилээх тэрилтэ – бастакы, орто састааптаах тэрилтэ – иккис, уонтан тахса киһилээх тэрилтэ – үһүс бөлөхтөр. Бүгүҥҥү күрэхтэһиигэ бастакы бөлөххө – 10 (11 этэ), иккис бөлөххө – 13 (16 этэ), үһүс бөлөххө – 12 (18 этэ) хамаанда кытынна. Сыл аайы олус күүстээх хамаандалар күөн көрсөллөр. Ол курдук, бастакы бөлөххө цииркэ, “Саха” НКИХ, иккис бөлөххө Музыка үрдүкү оскуолата, үҥкүү тыйаатыра, үһүскэ литературнай музей курдук тэрилтэлэр киирсээччилэр.

 

 

Тыҥааһыннаах күрэхтэһиигэ сылдьар дьон диэтэххэ, култуура үлэһиттэрэ диэх курдук, “эйиэнэ-миэнэ” диэбэккэ, бэйэ-бэйэни өйөһүү бу күрэхтэһиигэ арылхайдык көһүннэ. Ол курдук, “Ситим” медиа киин спортсменнара бэйэлэрин “иэстэрин” бүтэрэн баран, аны “Сахамедиа” холдинг суруналыыстарыгар кэлэн ыарыйдылар, хабылыктарын, хаамыскаларын уларсан эрчиллэрбитигэр көмөлөстүлэр. Онон, түгэнинэн туһанан, биир идэлээхтэрбитигэр истиҥ махталбытын тиэрдэбит.

 

Дьүүллүүр сүбэ тыҥааһыннаах киирсиини күн аҥара дьүүллэһэн баран, хамаандаларынан күрэхтэһии түмүгүн маннык таһаарда:

 

1 бөлөххө:

1 миэстэ – Цииркэ,

2 миэстэ – Эстрада тыйаатыра,

3 миэстэ – “Саха” НКИХ.

 

2 бөлөххө :

1 миэстэ – Үҥкүү тыйаатыра,

2 миэстэ – ОЦНТ (норуот айымньытын киинэ),

3 миэстэ – национальнай уус-уран музей.

 

3 бөлөххө:

1 миэстэ – “Ситим” медиакиин,

2 миэстэ – “Кэскил” Оҕо бэчээтин кыһата,

3 миэстэ – Литература музейа.

 

Спартакиада салҕанар. Кэлэр нэдиэлэттэн култуура үлэһиттэрэ атын спортивнай көрүҥнэргэ күрэхтэһиэхтэрэ.

 

Елена ПОТОЦКАЯ, «Саха сирэ» хаһыат, www.edersaas.ru