Кыдьыктаах кыһын кылбаа маҥан хаарынан ыскайдаан, кыһыгырас тымныытынан кымньыылаан, тоҥорор-хатарар толомон тымныытын түһэрэн турар кэмигэр, тохсунньу 26 күнүгэр, Бээрийэҕэ биир сонун күн буолан ааста. Улуустааҕы Олоҥхо ассоциацията, культура управлениета тэрийиилэринэн, Ыччат сылыгар сыһыаран норуот тылынан уус-уран айымньытын тарҕатыыга туһуламмыт “Аартыктарынан айан” диэн ааттаах, дьэ чахчы даҕаны самныбат санаалаах, тулхадыйбат тутуллаах, тобуллаҕас толкуйдаах, сырдык-ыраас ыралаах, сайдам-сайаҕас майгылаах саха киэнэ саарыннара – күн санаалаах улууспут талааннаах ыччатын фольклорнай десана ыалдьыттаата. Тэрээһин үөрүүлээх аһыллыытын олохтоох “Арчы” культура киинин көҕүлээһининэн туруорааччы-хореограф, СР культуратын туйгуна А.С.Васильева туруорбут “Дойдум миэнэ – Бээрийэм!” вокальнай-хореографическай композициянан арыйдылар. Нэһилиэк баһылыга П.В.Васильев төрөөбүт төрүт түөлбэтин оҕолорун кытары бургунас ынах муоһунуу дьүөрэлэһэн үөскээбит ыччат дьонун, дьарҕаалаах тыа курдук ханыылаһан үөскээбит бар дьонун аатыттан кэлбит ыалдьыттары эҕэрдэлээтэ уонна норуот уус-уран айымньытын тарҕаталларыгар махтанан туран,  Р.Р. Васильев хомуйан таһаартарбыт “Ойуун ууһа Бээрийэлэр” диэн нэһилиэк историятын кинигэтин хас биирдии кэлбит ыалдьыкка бэлэх уунна.

Нэһилиэнньэни кытта көрсүһүүнү улуустааҕы культура управлениетын сүрүн специалиһа А.Е.Федорова иилээн-саҕалаан ыытта. Төрүт үҥкүүбүт оһуохай араастарын туһунан СР культуратын үтүөлээх үлэһитэ  М.З.Сивцева умсугутуулаахтык кэпсээтэ.  Чабырҕах этэр тэтимин, тыла-өһө баайын, хомоҕойун, үөрэ-дьүөрэ түһэриитин, чуолкайдык иһиллиитин, туттуу-хаптыы эгэлгэтин дьоҥҥо Найахытааҕы сынньалаҥ киинин специалиһа Нь.Никитина тиэртэ. Уус-уран саҥаҕа, уобараһы арыйыыга чаҕылхай маастарыстыбаны ХИФУ студентката, элбэҕи эрэннэрэр талааннаах ыччат Алина Герасимова көрдөрдө. Эмиэ ХИФУ студентката  И.Охлопкова хомус сыыйа тардыытын кистэлэҥнэрин олус тиийимтиэтик көрдөрөн сөхтөрдө. В.Новоприезжай  дэгэрэҥ ырыа ураты кэрэтин, хайдах туттан-хаптан ыллыахха сөбүн бэрт сэргэхтик үөрэттэ, иһитиннэрдэ. Бэйдиҥэтээҕи сынньалаҥ киинин специалиһа А.Лугинова фольклор курдук уустук хайысхаҕа дьону хайдах түмэ тардарга бэйэтин уопутун үллэһиннэ, элбэх киһини хайдах интэриэһиргэтэргэ тус бэйэтин  албастарын арыйда. Бороҕоннооҕу оҕо искусство оскуолатын уһуйааччыта Л.Слепцова норуот ырыата билиҥҥи кэмҥэ тарҕаныытын, киэҥник туттуллуутун туһунан сиһилии кэпсээтэ. Уус-уран ааҕыы үрдүк маастарыстыбатын культура колледжын студеннара Д.Дьячковскай, Н.Федоров чаҕылхайдык көрдөрдүлэр.  Олоҥхо туох баар фольклор бүтүннүүтэ түмүллүбүтэ буоларын АГИКиИ норуот культуратын кафедратын ст.преподавателэ  З.А.Стрекаловская өссө дириҥник бигэргэтэн кэпсээтэ.

Кэлбит ыалдьыттарбыт бу истиҥ көрсүһүүнү үрдүк таһымнаах кэнсиэри көрдөрөн нэһилиэнньэни сөхтөрдүлэр. Саха фольклора биһиги норуоппут ханна да хатыламмат, туохха да бэриллибэт дириҥ ис хоһоонноох баайа буоларын өссө төгүл бигэргэттилэр.

Биһикпитин ыйаабыт сирбит үтүөтүн, өҥөтүн, күндүтүн ыччаппыт өйүгэр-санаатыгар тиэртэхпитинэ, иҥэрдэхпитинэ, ииттэхпитинэ – төрөөбүт норуоттарын албан аата, суон сураҕа аар-саарга аатырарын, төрүт түөлбэлэрин олоҕо-дьаһаҕа уйгуланарын-сайдарын туһугар үлэлиэхтэрэ-хамсыахтара!

Бээрийэ нэһилиэгин “Арчы” культура киинин коллектива.