Өксөкүлээх Өлөксөй аатынан норуоттар доҕордоһууларын дьиэтин «Симэх» норуот ускуустубатын Киинин салайааччыта,  СӨ суруйааччыларын чилиэнэ, СӨ маастардарын сойууһун бэрэсэдээтэлэ, ускуустуба үтүөлээх деятелэ, худуоһунньук, поэт, маастар Александр Николаевич Гоголевы – Сатал Уустуун көрсөн кэпсэттибит.

 

Александр Николаевич, норуот маастарын күнүн хас сылын аайы киэҥ далааһыннаахтык бэлиэтиигит.Бэлэмнэнии үлэ хайдах баран иһэрий?

Саха сирин Ил Дархана Егор Борисов ыйааҕынан кулун тутар 5 күнэ – Саха Өрөспүүбүлүкэтин норуот маастарын күнүнэн биллэриллибитэ.  Норуот маастарын күнүн чэрчитинэн араас хабааннаах тэрээһиннэр ыытыллан үтүө үгэскэ кубулуйда. Норуот маастарын күнэ быйыл 5 сылын бэлиэтэнэр.

 

Быйылгы быыстапка дьаарбаҥкаҕа хас улуустан уонна кимнээх кытталларый?

Хас сыл аайы кыттааччы ахсаана элбээн иһэр, хотугу улуустан кытта сайаапка киирдэ.

 

Саха сирэ – уустар дойдулара – дииллэр. Бука сэрэйдэххэ мээнэҕэ этиллибэтэҕэ буолуо. Саха сирин үрдүнэн хас норуот маастара  уонна уус – уран оҥоһуктарга үлэлиир маастар баарый?

Норуот маастара 200, уус – уран оҥоһуктарга үлэлиир маастар баарый 360

 

Хас сыл аайы норуот маастарын күнүн бэлиэтииргитигэр саҥаттан саҥаны тэрийэҕит. Былырыын Бүтүн Арассыйааҕа  сураҕырбыт «Күн табата» этническэй бэстибээл буолбута. Cүрдээх үрдүк таһымҥа, киэҥ далааһыннаахтык  ыытыллыбыта. Дойду күүстээх модельердара, саха сирин олохтоохторугар көрдөрбүттэрин бары өйдүүбүт. Быйыл туох саҥа сүүрээн былааҥҥа баарый?

Быйыл сонун сүүрээн күүтэр. Ол курдук кулун тутар 5 күнүгэр, күнүс 12 чаастан Дьокуускай куорат Орджоникидзе аатынан болуоссаттан саҕалаан Ленин болуоссатыгар тиийэ Саха Өрөспүүбүлүкэтин норуот маастарын күнүгэр анаммыт бырааһынньыктааҕы норуот айар талааннаахтарын уустаан –ураннаан, оһуордаан – мандардаан  тикпит дьикти кэрэ таҥастарын кэтэн сэлэлии хаамыы тэриллиэҕэ. Бу тэрээһин Өрөспүүбүлүкэ норуотун маастардарын, норуот айар талааннаахтарын, уус – уран оҥоһугунан дьарыктанар холбоһуктарын айар үлэлэрин сайыннарыыны уонна киэҥник тарҕатыыны күүһүрдүөҕэ.

 

Тэрийээччилэринэн Өксөкүлээх Өлөксөй аатынан норуоттар доҕордоһууларын дьиэтэ, Дьокуускай куорат салалтата, «Симэх» норуот ускуустубатын Киинэ, «Уус» Саха Өрөспүүбүлүкэтин маастардарын айар Сойууһа буолар.

 

Саха сирин маастардарын маҥнайгы улахан хамсааһыннарыгар Өрөспүүбүлүкэ норуотун маастардарын, норуот айар талааннаахтарын, уус – уран оҥоһугунан дьарыктанар холбоһуктары, уопсастыбаннай түмсүүлэри, тэрилтэлэри, анал үөрэх кыһаларын, устудьуоннары биһирэмнээн ыҥырабыт.

 

Кыттыыга ирдэбил:

 

Маастардар колонналара улуустарынан, үөрэх кыһаларынан, уопсастыбаннай түмсүүлэринэн, тэрилтэлэринэн бөлөхтөнөн тэриллэр;

 

Хас биирдии улуус, үөрэх кыһата, уопсастыбаннай түмсүү, тэрилтэ бэйэлэрин колонналарын иилиир-саҕалыыр бас киһилээх буолуохтаахтар;

 

Эмблема ойуутун кээмэйэ 120 см куоһарыа суохтаах.

 

Колонналары туруоруу, бэрээдэктээһин Орджоникидзе болуоссатыгар сарсыарда 10.30 ч. саҕаланыа.

 

Александр Николаевич, эһиги уустаргыт, маастардаргыт үлэлэрэ Аар саарга аатырдын, инникитин даҕаны маннык тэрээһиннэр ыытылла, дьону – сэргэни сэргэхситэ турдуннар.