Бүгүн Норуот маастарын күнүн чэрчитинэн өрөспүүбүлүкэтээҕи норуот маастардарын V форума буолла.

«Прикладной искусствоны уонна уус-уран оҥоһугу харыстааһыҥҥа уонна сайыннарыыга муниципальнай тэриллиилэр оруоллара» диэн пленарнай мунньахха 20 муниципальнай тэриллииттэн 170-тан тахса норуот маастара кытынна. Уопсайа 20 дакылаатчыт тыл эттэ.

Форум кыттыылаахтара өрөспүүбүлүкэҕэ Норуот прикладной искусствотын уонна уус-уран оҥоһугун государственнай автономнай тэрилтэтин, улуустарга Уус-уран оҥоһук кииннэрин тэрийэргэ, саха сувенирнай бородууксуйатын дойду тас өттүгэр таһаарар үлэни ыытыы, өрөспүүбүлүкэтээҕи норуот маастардарын Ытык сүбэтин тэрийии уо. да. а. бэрт кэскиллээх этиилэри пленарнай мунньах резолюциятыгар киллэрдилэр.

Удмуртияҕа Уус-уран оҥоһук национальнай киинин үлэтин уопутун Ижевскай куораттан кэлбит бу киин дириэктэрин научнай-методическай үлэҕэ солбуйааччы Ольга Пислегова кэпсээтэ. Онтон Москваттан сылдьар Арассыыйатааҕы государственнай Норуот айымньытын дьиэтин эппиэттээх үлэһитэ Юлия Иванова:

— Саха сирин улуустарыгар Уус-уран оҥоһук кииннэрин тэрийэр этиигитин истэн, өйүүрбүн биллэрэбин. Норуот маастарын өйөбүл муниципальнай тэриллии таһымыттан саҕаланыахтаах. Мин санаабар, куонкурус быһыытынан баһылык анал бирииһигэр норуот маастардарын куонкурустарын тэрийиэххэ сөп. Оччотугар норуот үгэстэрэ көлүөнэттэн көлүөнэҕэ бэриллэн иһиэх этилэр, — диэн бэлиэтээтэ.

Мин форум кэмигэр 1979-1988 сылларга Норуот уус-уран айымньытын уонна култуурунай-сырдатар киин дириэктэринэн үлэлээбит Гаврил Софроновы кытта көрсөн кэпсэттим.

— Норуот мастардарын түмэр ис хоһоонноох биэс форумҥа барытыгар сырыттым. Онон туох сайдыы, инникигэ хардыы баарын истэ, билэ-көрө сылдьабын. Маннык тэрээһиннэр сүрүн соруктара — норуот мастардарын ахсааны элбэтии, кинилэр үлэлиир усулуобуйаларын тупсарыыга үлэлэһии. Кырдьык, маастар ахсаана биллэ элбээтэ. Кэрэхсэбиллээҕэ, норуот маастардара эдэр дьонунан элбээн эрэр. Сэбиэскэй кэм саҕана норуот уус-уран айымньытыгар улахан болҕомто ууруллубат этэ. Бу хайысхаҕа үлэни ыытыыга бастакы саҕалааччыларынан биһиги этибит.

Норуот сахалыы тыынын уһуктуута 90-с сыллартан «төлө барбыта». Саха сахатын билиниитэ онно уһуктан, норуоппут төрүт үгэстэрин сөргүтүү саҕаламмыта. Быйылгы норуот мастардарын түмэр форумҥа норуот уус-уран айымньытын биир кииннэииргэ кэпсэтии барбытын биһирии ылынным. Олоҥхо тыйаатыра, Хомус түмэлэ, Норуоттар доҕордоһууларын дьиэтэ тус-туһунан сайдан олороллор. Онон саха тыынын сирэйдиир норуот айымньытын бииргэ түмэр кэм кэллэ дии саныыбын, — диэн санаатын үллэһиннэ Гаврил Григорьевич.

Өрөбүл күннэргэ Өксөкүүлээх аатынан Доҕордоһуу дьиэтигэр уус-уран оҥоһук быыстапката, Норуот маастарын күнүгэр анаммыт сахалыы таҥаһы таҥнан баран, бырааһынньыктааҕы сэлэлээн хаамыы, «Уруйдан, Уус күнэ!» диэн театрализованнай көстүү буолуоҕа.

Елена ПОТОЦКАЯ, «Саха сирэ» хаһыат, http://edersaas.ru