Кулун тутар 2 күнүттэн саҕалаан, киин куоракка Дьокуускайга өрөспүүбүлүкэ 22 улууһуттан уопсайа 400-тэн тахса норуот маастара муһунна.

 

Бээтинсэҕэ, кулун тутар 3 күнүгэр иис-уус маастардара “Прикладной искусствоны уонна уус-уран оҥоһугу харыстааһыҥҥа итиэннэ сайыннарыыга муниципальнай тэриллиилэр оруоллара” диэн өрөспүүбүлүкэтээҕи норуот маастардарын V форумугар көхтөөх кыттыыны ыллылар.

 

Оттон сарсын, өрөбүлгэ Саха сирин маастардара – араас омук бэрэстэбиитэллэрэ, уустаан-ураннаан тигиллибит бэйэлэрин национальнай көстүүмнэрин, таҥастарын-симэхтэрин киэн тутта кэтэн, киин проспект устун сэлэлии хаамыахтара.

 

Маннык кэрэ-бэлиэ кэмҥэ, Өксөкүлээх Өлөксөй аатынан Норуоттар доҕордоһууларын киинин генеральнай дириэктэрин, РФ уонна СӨ култууратын үтүөлээх үлэһитин Яна Викторовна Игнатьеваны көрсөн кэпсэттим, онуоха:

 

 

—Норуот маастарын күнэ диэн дойду атын регионугар ханна да суох. Биһиэхэ, Саха Өрөспүүбүлүкэтигэр эрэ баар.

 

Өссө биэс сыл анараа өттүгэр норуот маастардарын I форумугар биһиги, норуот маастардара анал сокуоннаах буолуохтаахпыт диэн туруорсаммыт, резолюциябытыгар киллэрбиппит.

 

Онон, билигин уус-уран оҥоһугу сайыннарыыга  бэйэбит сокуоннаахпыт диэн киэн тутта этэбит.

 

Билигин норуот искусствота саамай сайдан турар кэмэ!

 

Өрөспүүбүлүкэбит Аҕа баһылыга Егор Борисов олохтоох бэйэ оҥорор бородууксуйатын сайыннарыҥ, дэлэтиҥ, киэҥ сиргэ таһаарыҥ, диир. Саха сирин брендин оҥорор дьону өйүөххэ, диир. Онон, маастардарга олус тоҕоостоох кэм, билигин.

 

 Владимир Тихонов — ортоку

 

Хас биирдии сэлиэнньэҕэ олохтоох бэйэ бородууксуйатын оҥорон таһаарарга сөптөөх кэм кэллэ! Маастардар онуоха бэлэмнэр. Кинилэри олохтоох дьаһалталар өссө күүскэ өйүөхтэрин наада.

 

Бэрт кыра “толчуок” эрэ наада. Ол тугуй? Ол – сырье буларга көмө! Сэлии муоһа, таба, тайах муоһа, түүлээх арааһа, тирии арааһа… Соҕотуопкалыыр сыахтар баар буолуохтаахтар. Ол сыахтар сырьену норуот маастардарыгар закупочнай сыананан атыылыахтаахтар. Итиэннэ, бу эмиэ биир саамай улахан суолталаах – оҥорбут бородууксуйалара атыыга барыан наада. Атыылаһар, атыылыыр, ырыынакка таһаарар тэрилтэлэр наадалар. Каадырдар балачча бааллар ээ. Эдэр исписэлиистэри АГИКИ, художественнай колледж, Намнааҕы педколледж о.д.а. улуустарга баар үөрэх кыһалара бэлэмнээн таһаараллар. Онон, кыаллыан сөп дьыала.

 

Уус-уран оҥоһук араас көрүҥүнэн Саха сиригэр 5000-тан тахса киһи дьарыгырар. Онтон Саха Өрөспүүбүлүкэтин норуот маастара ааты 206  киһи сүгэр. 400-тэн тахса киһи уус-уран оҥоһук маастара буолар. Маны таһынан улуус маастардара, педагог-маастардар, “мастер-умелец” дьоһун ааттаах дьон бааллар.

 

Онон, өрөспүүбүлүкэбитигэр норуот маастардарын хамсааһына киэҥ далааһыннанна. Бу – норуот хамсааһына! Биһиги онон киэн туттабыт.

 

Өссө биир үөрүүлээх түгэммитинэн буолар, норуот прикладной искусствотын уонна уус-уран оҥоһуктарын национальнай киинэ — “Симэх” галереябыт,  быйыл алтынньыга 25 сылын туолуоҕа. “Симэх” бэйэтэ юридическэй сирэйдээх, автономнай, бэйэтэ статустаах буолуохтаах.

 

Бу 25 сыл устата, үгэстэри  утумнаан, саха норуотун уонна  хотугу норуоттар искусстволара, уус-уран оҥоһуктара, иистэрэ-уустара тилиннэ, салгыы өссө сайдар суолга киирдэ диир кыахтаахпыт,—диэн санаатын  үллэһиннэ Яна Викторовна.

 

Икки күн устата Өксөкүлээх Өлөксөй аатынан Норуоттар доҕордоһууларын киинигэр өрөспүүбүлүкэбитигэр үтүө үгэс буолбут “Якутия мастеровая” VII дьаарбаҥка-быыстапка үлэлиэҕэ.

 

Татьяна Маркова, «Саха сирэ» хаһыат, http://www.edersaas.ru/