2017-03-20

«Уруйдан улуу Олоҥхобут» Республикатааҕы 12 фестиваль туһунан

Просмотров: 1316

b0acffc0-4996-481b-a911-1735be9bdf78

 

Норуоппут үтүө үгэстэрин өрө тутан, ону үйэтитиигэ, үүнэр көлүөнэҕэ тиэрдиигэ тиһиктээх, кэскиллээх үлэни ыыта олорор «Арчы Дьиэтэ» духуобунай культура киинэ быйыл 12-с төгүлүн «Уруйдан, улуу олоҥхобут» фестивалы дьоһуннаахтык тэрийэн ыытта (сал. Бочонина В.И., Михайлов Б.Н.). Фестивальга республика 6 улууһуттан уонна Дьокуускай куораттан 142 толорооччу кыттыыны ылла. Дьүүллүүр сүбэҕэ А.Е. Захарова, Саха Республикатын норуоттарын култуурунай нэһилиэстибэлэрин киинин салайааччыта; А.П. Решетникова, Музыка уонна фольклор музейын директора; Н.С. Толбонова, Саха Республикатын култууратын үтүөлээх үлэһитэ; Е.Н. Протодьяконова, Саха Республикатын норуоттарын култуурунай нэһилиэстибэлэрин киинин сүрүннүүр специалиһа үлэлээтилэр. Барыта 12 бөлөҕүнэн, 15 биирдиилээн толорууну иһиттибит. Айылҕаттан айдарыылаах ураты эйгэлээх толорооччуларбыт суолталаан, ис-истэриттэн иэйэн, бэлэмнэнэн кэлэн кыттыыны ыллылар. Сыл аайы кыттааччы ахсаана элбээн, толорор репертуардара кэҥээн, толорооччулар таһымнара үрдээн иһэрэ бэлиэтэннэ. Репертуары таба талыыга, ордук түөлбэ үгэстэрин тилиннэриигэ болҕомто ууруллар, олоҥхо этэр тылын, ырыатын-тойугун тэнҥэ тутан толоруу ирдэниллэр. Хас биирдии толоруу кэнниттэн туһалаах сүбэлэр, баҕа санаалар этилиннилэр.

 

76c542d9-4709-44a4-9eb0-f6745c9c30d9

 

Ааттара-суоллара тарҕаммыт ытык дьоммут — олоҥхоһуттар, олоҥхону тарҕатааччылар фестиваль бочуоттаах ыалдьыттара буоллулар: Иванов С.И., Сафонов Н.И., Григорьев И.А., Тихонов П.М., Илларионов В.В. уонна Г.Г. Колесов кыыһа Оксана Гаврильевна. Фестивалы Бочонина В.И. иилээн-саҕалаан ыытта.

 

b970a53e-0412-41b1-9434-897786de13bd

 

Фестиваль түмүгүнэн биирдиилээн толорууга Гран-при хаһаайынынан бастыҥ олоҥхону толорооччу Лазарева Сусанна Васильевна (Чурапчы улууһа) буолла. Г.Г. Колесов аатынан анал бирииһи бастыҥ олоҥхону толорооччу, былырыыҥҥы «Уруйдан, улуу Олоҥхобут» фестиваль Гран-при хаһаайына, Григорьев Николай Никитич (Чурапчы улууһа) ылла. 1 ст. лауреат аатын 83 саастаах ытык кырдьаҕас Иванов Семен Иннокентьевич (Бүлүү улуу¤а), 2-с ст. лауреат аатын Цой Людмила Константиновна (Таатта улуу¤а), 3-с ст. лауреат аатын Соколова Валентина Николаевна (Дьокуускай к.) ыллылар.

 

bb4b3f0c-2aa4-444f-95de-1fae87e00f42

 

Бөлөҕүнэн толорууга, У.Г. Нохсоров аатынан анал бирииһи «Дьолуо — Таатта» (Таатта, сал. Цой Л.К.) бөлөҕө ылла. 1 ст. лауреат аатын В.О. Каратаев аатынан олоҥхоһуттар норуодунай коллективтара (Бүлүү, сал. Иванова С.Т.), 2-с ст. лауреат аатын Таатта Дьохсоҕонуттан фольклор бөлөҕө (сал. Харайданова В.П.), 3-с ст. лауреат аатын «Күөгэйээнэ» бөлөх (Амма, сал. Артемьева А.Е.) ыллылар. Бастыҥнарга анал ааттар иҥэрилиннилэр. Ол курдук, «Олоҥхоҕо саҥа аат» — Егорова Мария Романовна (Уус-Алдан), «Кэскиллээх толорооччу» — Ефремов Александр (Амма), «Көрөөччү-истээччи биһирэбилэ» — «Дьэ-буо» фольклор бөлөҕө (Дьокуускай к., сал Птицын И.И.), «Түөлбэ уратытын утумнааччы» — «Көһөҥө-Ситим» фольклор бөлөҕө (Таатта, Чөркөөх, сал. Яковлева М.П.), «Олоҥхо үгэһин утумнааччы» — Спирдонов Гаврил Васильевич (Мэҥэ-Хаҥалас), «Дорҕоон тойуктаах толорооччу» — Христофоров Анатолий Николаевич (Чурапчы ул., Мырыла сэл.) буоллулар. Маны таһынан, дьүүллүүр сүбэ бэлиэтээбит дьонугар грамоталар, сыаналаах бэлэхтэр туттарылыннылар. Кэлбит дьон бары дуоһуйан тарҕастылар.

 

e4e8cda9-32d1-4384-b516-b6a305f3dac7

 

Дьүүллүүр сүбэ фестиваль түмүгүнэн сайын бэс ыйыгар Олоҥхо Ыһыаҕар уонна от ыйыгар ыытыллыахтаах Аан дойдутааҕы эпоһы толорооччулар фестивалларыгар кыттааччылары быһаарда.

 

Арчы Дьиэтэ тэрийэн ыытар «Уруйдан улуу олоҥхобут» фестивала салгыы ис хоһооно дириҥээн, сайдан олоҥхону толорооччулары иитиигэ тирэх буола турарыгар эрэнэбит.

 

Елена Протодьяконова

Поделиться

Переход на предыдущую и следующую статью