2017 сыл кулун тутар 17-18 күннэригэр Мэҥэ Хаҥалас улууһун I Тыыллыма нэһилиэгэр «Ыччат олоҥхоһут» өрөспүүбүлүкэтээҕи общественнай тэрилтэ тэрийиитинэн «Куйуур олоҥхото» ыытылынна. Онуоха быһаччы тэрийэр оруолу түмсүү салайааччыта Юрий Петрович Борисов ылбытын бэлиэтиир наадалаах. Икки күн устата барыта 11 биирдиилээн толорооччу уонна Арктическай култуура уонна ускуустуба государственнай институтуттан 7 оҕолоох «Долун» бөлөх кытынна. Бастакы күн сэрэбиэй тардыытынан киэһэ хойукка диэри олоҥхону истии саҕаланна. Сарсыҥҥытыгар Лүкээрики эбэҕэ куйуурдааһын буолла. Эдэр дьон куйуур туһунан кэпсээнтэн эрэ истэллэрин бу күн ойбон алларсан, маҥкы маһын эргитэн көрдүлэр-иһиттилэр, былыр өбүгэлэрбит хайдах быһыылаахтык куйуурдаан үрүҥ тыыннарын өрүһүнэллэрин туһунан кэпсэттилэр. Күн иккис аҥарыттан олоҥхону салгыы истии буолла. Бу курдук икки күн устата толорууну дуоһуйа иһиттибит. Дьүүллүүр сүбэҕэ Попова Г.С.-Санаайа (ХИФУ), Винокуров В.В. (ХИФУ), Флегонтова У.М. (Норуоттар доҕордоһууларын дьиэтэ, СӨ НКН Киинэ), Иванова Е.Н. (Мэҥэ Хаҥалас, Олоҥхо дьиэтэ) үлэлээтилэр.

Истии кэннэ санаа үллэстиитигэр быйылгы күөн күрэскэ кыттааччы ахсаана лаппа эбиллибитэ, З.А. Стрекаловская уонна С.В. Харитонова салайааччылардаах Арктикатааҕы уонна Дьокуускайдааҕы култуура уонна ускуустуба үөрэҕин тэрилтэлэриттэн көхтөөх кыттыы биһирэннэ. Олоҥхону толорууга репертуары талыы суолтата бэлиэтэннэ, П.А Ойуунускай «Дьулуруйар Ньургун Боотур» олоҥхотун курдук классическай айымньылары толоруу таһымҥа таһаарара, түөлбэ олоҥхолору үөрэтии сөптөөҕө, күөн күрэс уратытыгар сөп түбэһэр куйуур, куйуурдааһын туһунан ахтыллар быһа тардыылары толоруу кэрэхсэниэн, эпическэй айымньы сэһэнин сүнньүн толорутук биэриигэ дьулуһуу, олоҥхо тылын таба туттуу хайаан да ирдэнэрин курдук түгэннэргэ болҕомто уурулунна.

Күөн күрэс Кылаан бирииһин Никифоров В.В. (Мэҥэ Хаҥалас) иккис төгүлүн ылла. Юрий Борисов «Тэтими тутар олоҥхоһут» (Олоҥхо института), Станислав Иванов «Сэһэн сүнньүн тутааччы» (Мэҥэ Хаҥалас), Александра Васильева «Кылыһах ырыалаах, дорҕоон тойуктаах» (ДьКУК), Наталья Стручкова «Хомоҕой тыллаах олоҥхоһут» (ДьКУК), Куланова Тамара «Удьуор утумун тутааччы» (АГКУИ), Петр Филиппов «Кэскиллээх олоҥхоһут» (ДьКУК) диэн Анал ааттары ыллылар. Истээччилэргэ бастыҥ Ноо-һут аатын Н.Д. Ларионова (Мэҥэ Хаҥалас) ылла.

Түмүккэ I Тыыллыма нэһилиэгин баһылыгар Афанасьев Руслан Васильевичка, тэрээһин ыытыллыбыт Саха балаҕанын хотунугар Прокопьева Мария Васильевнаҕа, нэһилиэк библиотекара Егорова Любовь Николаевнаҕа, оскуола коллективыгар, ол иһигэр чуолаан Егорова Евдокия Павловнаҕа, сылаас чээйдээх, минньигэс аһылыктаах нэһилиэк бары далбар хотуттарыгар махтал тыллара этилиннэ.

Бу курдук «Куйуур олоҥхото» тэрээһин билиҥҥи олоххо олоҥхобут эйгэтэ кэҥиир, киһиттэн киһиэхэ, көлүөнэттэн көлүөнэҕэ бэриллэр биир көрүҥэ буолан ситиһиилээхтик ааста.

Ульяна Флегонтова