Ыам ыйын 26 күнүгэр 2017 сылга Өксөкүүлээх Өлөксөй норуоттар доҕордоһууларын дьиэтигэр «Хаҥыл Уус» Хаҥалас улууһугар норуот маастардарын, уустарын, уран тарбахтаахтарын сылыгар анаммыт улахан быыстапка-тэрээһин буолан ааста.

 

Быыстапкаҕа уопсайа 65 Хаҥалас улууһун уран тарбахтаахтырын, айдарыылаах маастардарын кэрэ оҥоһуктара, иистэрэ, үйэлээх үлэлэрэ түмүллэн киэҥ көрүүгэ таҕыста. Маны таһынан атыы-эргиэн түһүлгэтигэр 18 иис-уус дьарыгын баһылаабыт тарбаҕар талааннаах биир дойдулаахтарбыт кэрэ оҥоһуктарын, сувенирдарын атыылаатылар.

 

 

Быыстапка үөрүүлээх аһыллыытыгар Хаҥалас улууһун баһылыга Алексеев Г.Ю., култуура уонна духуобунас салалтатын начальнига Громова С.В. э5эрдэ тыл эттилэр. Норуот уус-уран искусствотын эйгэтигэр сүдү кылааттарын иһин Өксөкүүлээх Өлөксөй аатынан норуоттар доҕордоһууларын дьиэтин бочуотунай грамоталарынан наҕараадаланнылар: өр сылларга “Уран” киини салайан кэлбит Тимофеева Анна Кирилловна,  Никифоров Александр Андреевич (СР норуотун маастара), Черноградскай Семен Степанович (СР норуотун маастара), Лотов Валерий Петрович (СР норуотун маастара), Христофоров Иван Ильич (СР норуотун маастара), Никитин Николай Ильич (СР норуотун маастара), Варфоломеева Вера Семеновна(СР норуотун маастара), Данилов Александр Дмитриевич (СР норуотун маастара) уо.д.а.

 

Э5эрдэ кэнсиэри «Эркээни эдэр  сааһа» үнкүү норуотунай ансамбыла арыйда, тойугунан бар дьону э5эрдэлээн көрүстэ СР култууратын туйгуна Лидия Васильевна Харитонова, кэрэ нүөмэрдэрин бэлэхтээтилэр: саха республикатын народнай артыыһа Григорий Петров, Нария Ренанто.

 

 

Бу дьоро күн ахтан-санаан аастыбыт, улууспут аатын үрдүк таһымнаах быыстапкаларга чиэстээхтик көмүскээбит, киэн туттар норуоппут  маастардарын: талааннаах туосчуту, ытык киһибитин Гермонов Павел Павловыһы, маастар-педагог Никифорова Аграфена Петровнаны. Кинилэр үйэлэргэ сыаналанар үлэлэрэ бу быыстапка киэргэлэ буоллулар.

 

Бүтэһик сылларга Хаҥалас улууһугар  тимири уһаарыы, таптайыы, тимиринэн үлэ уустук көрүҥнэрэ сайдан эрэллэрэ улаханнык үөрдэр. Буотама тимир уустарыттан сыдьааннаах Данилов Александр Дмитриевич көҕүлээһининэн «Хаҥыл Уус» уустар түмсүүлэрин маастардара: мамонт муоһунан, удьурхайтан, үрүҥ көмүстэн, ону тэҥэ хомус, быһах, чороон, мас оҥоһуктарын быыстапка5а туруордулар. Быйыл Москва куоракка ыытыллыбыт “Клинок — 2017” конкурс кыайыылаа5а Хаҥалас уустара төрүт өбүгэ үгэһинэн, олохтоох матырыйаалтан, уһааран онорбут саха быһаҕа Аар саарга аатыран уруйданна. Улууспут быыстапкатыгар бучуоттаах миэстэҕэ турда.

 

 

«Хаҥыл Уус» быыстапка мааны ыалдьыттарынан уонна кыттааччыларынан “Эркээни” иистэнньэҥнэр түмсүүлэрэ буолла (салайааччы норуот маастара Наталия Григорьевна Павлова). Истэнньэҥнэр сүүрбэһис үйэ саҕанааҕы Ксенофонтовтар дьиэ кэргэн сахалыы мааны таҥастарын хаартысканан көрөн үөрэтэн, тигэн, сөргүтэн киэҥ көрдөрүүгэ таһаардылар. Тыл уонна культура институтун доцена С.И.Петрова көҕүлээһининэн, көмөтүнэн, сүбэтинэн-аматынан бу коллекция күн сирин көрдө.

 

Быыстапка5а удьуор – уус  Аграфена Петровна, Александр Андреевич Никифоровтар, кинилэр кэнэҕэски ыччаттарын оноһуктара бииргэ түмүллэн турда.

 

Үс саха аймаҕын төрдө – ууһа буолбут, саха саргытын түстэспит дириҥ силистээх улуус буоларбыт быһыытынан, Или тэрийэр, үтүө үгэспитин салҕаан «Хаҥыл Уус» быыстапка үлэтин саҕалаата.

 

Быыстапка ыам  ыйын 26  күнүттэн  бэс ыйын 11  күнүгэр дылы туруоҕа.

 

Надежда Степанова,

Хаҥалас улууһун культураҕа уонна духуобунаска сайдыытын методиһа