Кымыстыы кутуллар ырыалар Просмотров: 1188
Өксөкүлээх Өлөксөй аатынан норуоттар доҕордоһууларын Дьиэтэ бу дьыл бэс ыйын 10-16 күннэригэр «КЫМЫСТЫЫ КУТУЛЛАР ЫРЫАЛАР» бырайыагы тэрийэн ыытта. Бырайыак чэрчитинэн ыытылыннылар:
Бэс ыйын 10 күнүгэр. Таатта улууһун олоҥхо толорооччута, олонхону толорууга Хаҥалас «Олонхо Ыһыаҕын» Гран — при хаһаайката, Ийэ олонхоһут Петр Решетников — Көһөҥө Бүөтүр стипендиата, норуоттар икки ардыларынааҕы фольклорнай фестиваллар лауреаттара, СР үөрэҕириитин түйгуна РАИСА МАРКОВА «Олонхо эйгэтигэр айан» — олонхо — тойугу толоруу тыыныытыгар, кылыһаҕы таһаарыыга үөрэтии, олонхо персонажтарын ырыаларыгар дьарык уһуйаанын ыытта уонна «Өбүгэ көй дорҕооно» — диэн истиҥ — иһирэх айар киэһэтэ буолла.
Бэс ыйын 14 күнүгэр СР үтүөлээх артыыската, Государственнай эстрада театрын солиската, норуоттан икки ардыларынааҕы ырыа конкурстарын лауреата, өбүгэ төрүт кутун илдьэ сылдьар сахалыы кылыһахтаах куолас ВАРЯ АМАНАТОВА «Кымыстаах чороону көтөҕөн» Ыһыах ырыаларынан эҕэрдэ — көрсүһүү айар киэһэ ыытылынна.
Бэс ыйын 15 күнүгэр тойуксут, норуот ырыаларын толорооччу, ырыаһыт, оһуохайдьыт, норуоттар икки ардыларынааҕы фольклорнай фестиваллар лауреаттара, СР үөрэҕириитин туйгуна, үрдүк категориялаах уһуйааччы — учуутал, Сунтаартан төрүттээх Тоҕой Сэлэ тойуксута, Тойбохой нэһилиэгин бочуоттаах олохтооҕо ЛЮБОВЬ КАРАТАЕВА «Кутум — сүрүм кылыһаҕа» дьүһүйүү киэһэтэ тэрилиннэ.
Бэс ыйын 16 күнүгэр самаан сайыны, үрүҥ тунах Ыһыаҕы уруйдуур, кыталык ырыатынан кынаттанан сахалыы тыыннаах ырыалара көтүтэр күн күөрэгэй ырыаһыттар түмсүүлээх «КЫМЫСТЫЫ КУТУЛЛАР ЫРЫАЛАР» — 1-кы республикатааҕы Ыһыах ырыаларыгар күрэс ыытылынна.
Күрэскэ, төһө да Ыһыахтар буола туралларын үрдүнэ, Саха сирин араас улуустарыттан: Чурапчы, Хаҥалас, Нам, Уус — Алдан, Горнай уонна Дьокуускай куораттан сахалыы ырыаны таптаан ыллааччылар, Ыһыах ырыаларын тарҕатааччылар кырдьаҕастыын — эдэрдиин тоҕуоруһан кэлэн кытыннылар. Күрэһи республикатааҕы Дьүүллүүр сүбэтэ быһаарда. Дьүүллүүр сүбэҕэ үлэлээтилэр:
— Егоров Алексей Васильевич — СР народнай артыыһа, СР ырыа айааччыларын Союһын бэрэссэдээтэлэ, ырыаһыт, автор, педагог — дьүүллүүр сүбэ бэрэссэдээтэлэ.
— Пилецкая Альбина Афанасьевна — хормейстер, Дьокуускайдааҕы педагогическай колледж музыкальнай отделениятын преподавателя, Российскай Федерация Норуот үөрэҕириитин туйгуна, СР учууталларын учуутала, СР «21 үйэ учуутала» ааттар хаһаайкалара.
— Романова Валентина Николаевна — СР үтүөлээх артыыската, Государственнай Эстрада театрын солиската, саха джас — рок импровизатор ырыаһыта.
— Васильев Степан Иванович — СР культуратын үтүөлээх үлэһитэ, СР ырыа айааччыларын Союһын чилиэнэ, автор — мелодист, ырыаһыт, Кэбээйи улууһун бочуоттаах олохтооҕо. Бу күн күрэс кыайыылаахтарын Гала концера — көмүс дорҕоон түһүлгэтэ, кылыһахтаах ырыа ыһыаҕа, кыайыылаахтары наҕараадалааһын үөрүүлээхтик ыытылынна. Күрэс кыайыылаахтарынан таҕыстылар:
1. «Ырыа чаҕаан ырыаһыт» — Кристина Кулакова, 6 саастаах кыттааччы (Дьокуускай).
2. «Истиҥ иэйиилээх ырыаһыт» — аҕам саастаах ырыаһыт — Иган Владимир Иванович, 3 көлүөнэ оскуолатын 80 саастаах ырыаһыта (Дьокуускай).
3. «Алыптаах ырыа бастыҥа» — күргүөмүнэн чаҕылхай толоруу — «Тирэх» ветераннар ырыа ансаамбыла, сал. Кириллина Прасковья Дмитриевна (Ой Хаҥалас улууһа).
4. «Ылбаҕай ырыаһыт» — көрөөччү биһирэбилэ — Егорова Наталья Алексеевна (Бердигестях, Горнай улууһа).
5. «Кэрэхсэллээх кэрэ куолас» — кэскиллээх ырыаһыт номинация — Рустам Слепцов (Дьокуускай).
6. «Өбүгэттэн тардыылаах тойук» — бастыҥ тойук ансаамбыла — «Тойук» народнай этно-фольклорнай ансаамбыла, салайааччы Федорова Галина Гаврильевна (Дьокуускай).
7. «Айдарыылдаах тойуксут» — бастыҥ тойуксут — Екатерина Новикова, Иннокентий Птицын дуэттара. (Дьокуускай).
8. «Алгыстаах ырыаһыт» — бастыҥ алгыстаах ырыа — Никитина Мария Владимировна (Дьокуускай)
9. «Ураты куоластаах ырыаһыт» — хатыламмат куолас — Белолюбская — Окорокова Дойдууна Иннокентьевна (Дьокуускай).
10 . «Күн күөрэгэй ырыаһыт» — бастыҥ кылыһахтаах ырыаһыт — Соколова Валентина Николаевана (Дьокуускай).
11 . «Бастыҥ ырыа доҕуһуола» — бастыҥ аражировка.- «Эйээрик» фольк. бөлөх, салайааччы Кардашевская Анастасия Афанасьевна (Дьокуускай).
12. «Кылаан кылыһах» — кылыһахтаах ырыаһыт-Маркова Раиса Семеновна (Таатта).
13 «Сахалыы тыыннаах ырыа» — бастыҥ авторскай ырыа — Мохначевскай Константин Констанетинович (Чурапчы Чыаппара)
14. III- с степеннээх Диплом — Рустам Слепцов (Дьокуускай).
15. II- с степеннээх Диплом — Пестерев Николай Николаевич (Дьокуускай).
16. 1 — кы степеннээх Диплом — Семенова Пелагея Петровна (Ой Хаҥалас).
17. III-с степеннээх Лауреат — «Сайсары» народнай .ырыа ансаамбыла, салайааччы СР культуратын үтүөлээх үлэһитэ Степанова Светлана Константиновна.
18. II-с степеннээх Лауреат — «Эйээрик» фольклорнай бөлөх, салайааччы СР культуратын үтүөлээх үлэһитэ Кардашевская Анастасия Афанасьевна.
19. 1-кы степеннээх Лауреат — Белолюбская Мария Иннокентьевна (Нам улууһа).
20. Гран — При — Маркова Раиса Семеновна (Ытык — Күөл Таатта улууһа).
«Кымыстыы кутуллар ырыалар» кыайыылаахтарын концерта Туймаада Ыһыаҕын программатын чэрчитинэн Норуоттар доҕордоһууларын дьиэтин түһүлгэтигэр эмиэ ыытылынна.
Бу Ыһыаҕынан Эҕэрдэ концертка кыттыыны ыллылар сахалыы тыыннаах ырыаһыттар, СР үтүөлээх артыыстара: Варя Аманатова, Валентина Романова — Чыскыырай, аан дойду виртуоз хомусчута, СР үтүөлээх артыыската Альбина Дегтярева салайааччылаах, Амгаяна Григорьева, Нарыйаана Ренанто бэртээхэй хомусчуттардаах уонна ырыаһыттардаах «Айар хаан» бөлөҕө.
Көрөөччүлэр күрэс кыттыылаахтара ырыаһыттар: Константин Мохначевскай, Мария Никитина, Рустам Слепцов, Александра Старостина, Иннокентий Птицын, Екатерина Новикова, Наталья Егорова, Владимир Иган, тойуксуттар Раиса Маркова, Любовь Катараева, хомуска уонна дэгэрэҥ ырыаны толорууга Дьулуур Давыдов, кырачаан Кристина Кулакова, ансаамбыллар «Сайсары», «Дьээ буо», «Тойук» толорууларын дохсун ытыс тыаһынан көрүстүлэр, сэргээтилэр.
Концеры салайан ыытта, проект автора СР культуратын үтүөлээх үлэһитэ Светлана Лукина.
Бырайыак чэрчитинэн санаа астастаһыы — кэпсэтиһии, бырайыак инники сайдыытыгар былааннар ылыныллылар, элбэх көрөөччү, кыттааччы бырайыагы сэргээбиттэрин, өйүүллэрин биллэрдилэр.
Самаан сайыны айхаллыы, Үрүҥ тунах ыһыаҕы уруйдуу ыытыллыбыт 1-кы күрэс ситииһиилээхтик барда, инники өттүгэр сэмэй, ол эрэн суолталаах хардыытын оҥордо. Инникитин бырайык өссө киэҥ далааһыннаахтык ыытылларыгар эрэл үөскээтэ.
Бырайыагы өйөөбүт «Көмүлүөк» — саха дьоно киэҥ туттар сахалыы иһити оҥорор фирма директорыгар Григорьева Ольга Григорьевнаҕа, Дьокуускай куорат предпринимателлэрин координационнай Сэбиэтин чилиэнигэр Тымырова Татьяна Александровнаҕа, Норуоттар доҕордоһууларын дьиэтин генеральнай директорыгар Игнатьева Яна Викторовнаҕа, ытыктабыллаах дьүүллүүр сүбэҕэ уонна бары кыттааччыыларга барҕа махталы тириэрдэллэр.
