2017-10-25

Сатал УУС: “Норуот маастара” аат былдьаһык буолла

Просмотров: 1841

 

 

Норуот айымньытын сайыннарар, маастардары түмэр, сүрүннүүр аналлаах “Симэх” национальнай киин (Национальный центр народного прикладного искусства и художественных промыслов “Симэх”) дириэктэрэ Александр Николаевич ГОГОЛЕВ-САТАЛ УУС алтынньы 19 күнүгэр буолан ааспыт билим-быраактыка кэмпириэнсийэтин туһунан санаатын үллэстэр:

 

– Норуот айымньытыгар аналлаах билим кэмпириэнсийэтэ Дьокуускайга үһүс төгүлүн буолла. Бу иннинэ 2003, 2013 сс. ыытыллыбыта.

 

Оччоттон баччаҕа диэри кыһалҕабыт биир курдук көрөбүн. Маҥнайгы кэмпириэнсиэйэҕэ турбут боппуруостар билигин хаттаан көрүлүннүлэр. Тоҕо диэтэххэ, кэм-кэрдии уларыйар, ону сэргэ урут суох араас майгы киирэр, харгыс-мэһэй да үөскүүр.

 

Сугулааҥҥа 150-ча киһи кытынна. Сэттэ эрэгийиэнтэн кэллилэр. Москубаттан кэлбит Поленов аатынан Арассыыйатааҕы Норуот айымньытын дьиэтин үлэһитэ Т.А. Синельникова олус үчүгэй тылы эттэ. Дакылаат аахпыт дьон бары олус күүскэ бэлэмнэнэн кэлбиттэрэ көстөр, сытыытык эттилэр-тыыннылар. Ону таһынан, саҥа көрүүлэр бааллар. Бу кэнниттэн икки Төгүрүк остуол буолуоҕа, онно эмиэ этиэхтэрэ турдаҕа. Бу этиилэри барытын декада түмүк быһаарыыларыгар киллэриэхпит. Уонна туох баар этиилэри, дакылааттары хомуйан, буклет таһаарыахпыт. Ырытан, чинчийэн баран, дойду, өрөспүүбүлүкэ, улуустар салалталарын кытары үлэлиэхпит.

 

Отучча сыллааҕыта биһиэхэ норуот маастара олох аҕыйах, тарбахха баттанар этэ. Оттон билигин “Норуот маастара” диэн ааты ылбыт 600-чэ киһи баар. Ону таһынан сүүһүнэн-тыһыынчанан киһи үлэлиир буоллаҕа дии. Итинник официальнай аат, кырдьыга, былдьаһык буолла. Биэстии-алталыы сыл кэтэһиннэрэн, үлэлэрин үөрэтэн, ырытан баран биирдэ “Норуот маастара” ааты биэрэбит. Сорох букатын да ылыа суоҕун сөп. Ити аата, бу аат улахан үрдэлгэ таҕыста.

 

Биһиги өрөспүүбүлүкэбит салалтата, Култуура уонна духуобунай сайдыы министиэристибэтэ норуот маастардарын өйүүр элбэх дьаһаллары ылла, өссө да ылыаҕа. Холобур, урукку “Симэх” галерея билигин Национальнай киин быһыытынан үлэлээн эрэр. Тэрилтэбитигэр 14 киһи үлэлиир. Хас биирдиилэрэ анал хайысхалаахтар. Холобур, ааптар быраабын араҥаччылыыр, сокуону хааччыйар дьонноохпут. Мантан салгыы “дорожная карта” диэн былаан оҥостон үлэлиэхпит.

 

Тус бэйэм өссө 2003 сыллааҕы маҥнайгы кэмпириэнсийэҕэ “Маастар күнүн” төрүттүүрү туруорсубутум. Оччолорго дьон өйдөөбөтөҕө, бэл, күлээччилэр да бааллара. Оттон мин бэйэбэр чопчу сорук туруоруммутум, “маастар күнүн тэрийэн баран үлэлээн бүтүөм” дии саныырым. Көрөрүҥ курдук, күн бүгүҥҥэ диэри үлэлии сылдьабын, эбиитин улахан Национальнай киини салайар буоллум.

 

Култуура уонна духуобунай сайдыы министиэристибэтин пресс-киинэ

Поделиться

Переход на предыдущую и следующую статью