2017-12-20

Улуустааҕы киин балыыһа драмколлектива тэриллибитэ 35 сыла

Просмотров: 1131

 

Бу соторутааҕыта сахалартан бастакы ССРС народнай артыыһа, Саха сиригэр театральнай искусство сайдарыгар олук уурбут Дмитрий Федорович Ходулов аатынан Майатааҕы народнай театрыгар улуустааҕы киин балыыһа иһинэн тэриллибит драмколлектив 35 сылыгар аналлаах тэрээһин үрдүк таһымнаахтык ыытылынна.

 

 

Үөрүү уонна хомолто олох улахан театрыгар күннэтэ сиэттиһэ сылдьаллар. Биһиги бэйэбит да билбэппитинэн кинилэр оонньууларыгар олорсон күннэтэ үөрэбит, долгуйабыт, хомойобут, ытыыбыт…. Оччоттон, баччааҥҥа диэри биһиги олохпутугар сырдыгы, кэрэни, ырааһы түстүүллэр. Ырыаһыт ымыыта, үҥкүүһүт үтүөтэ, хоһоонньут хоһууна, тойуктаах туйгуна, артыыс ааттааҕа, талааннаах талбата буоларга, айар үлэҕэ алгыстаах аартыгы арыйарга көмөлөһөллөр – бу барыта холбоһон театр кэрэ эйгэтэ буолар!

 

 

35 сыл аннараа өттүгэр драмколлективы төрүттээбит киһинэн буолар Василий Прокопьевич Петров. Билигин кэлэктииби иилээн – саҕалаан илдьэ сылдьар Зоя Егоровна Москвина. Бу кэлэктиип Мэҥэ Хаҥалас улууһугар сыл ахсын култуура эстафетата ыытыллар буолан сценаҕа оонньуур маастырыстыбалара үрдээн иһэр. Араас таһымнаах бэстибээллэргэ, күрэхтэргэ ситиһиилээхтик кытталлар. Сүрүн артыыстарынан Александра Петровна Борисова, Пелагея Ивановна Кулаковская, Дмитрий Дмитриевич Титов, Марина Афанасьевна Потапова, Руслан Русланович Федоров, Мария Федосьевна Захарова, Александра Степановна Рожина, Егор Егорович Петров, Иннокентий Дмитриевич Антипин, Анастасия Васильевна Хван, Аида Игнатьевна Петрова, Наталья Григорьевна Спиридонова уо.д.а. Артыыстар Иван Гоголев – Кындыл «Наара суох», Степан Ефремов «Лэкиэс», Платон Ойуунускай  «Ыраахтааҕы ыйааҕа», Суорун Омоллоон «Сайсары» драматыттан быһа тардан көрдөрдүлэр.

 

 

Маны таһынан артыыстар уобарастарыгар киирэн көрдөөх – нардаах сценкалары көрөөччүлэргэ бэлэхтээтилэр. Театр үлэтэ дьону хамсатар, сайыннарар, өйүн-санаатын сырдатар, сааһылыыр сүдү күүстээх. Ону балыыһа кэлэктиибэ төһө да ыарахан үлэлээх буоллар барытын бииргэ тутан, былааннаан, салайан олорор тэрилтэ — бу өрөспүүбүлүкэҕэ соҕотох тэрилтэ буолуо.  Үтүө  дьон  үтүөлэрэ үксүү-үүнэ  турар  айылгылаах, ол курдук өр сыллар  устата театр эриирдээх, мускуурдах үлэтигэр эриллэн, мускуллан, күүскүтүн-күдэххитин, талааҥҥытын дьон-сэргэ сайдарын туһугар анааҥҥыт норуот ытыктабылын, биһирэбилин ылан дьоҥҥутугар-сэргэҕитигэр тарҕатаҕыт.

 

 

Тыа сирин  театра,  чэчирии сайдыытыгар киллэрбит кээмэйэ биллибэт үтүөҕүт-өҥөҕүт иһин барҕа махтал тылларын этэбит!

 

 

Ааккыт-суолгут ахтылла, сылдьыбыт сырыыгыт сыаналана, оҥорбут оҥкулгут уруйдана туруохтун.

 

 

Баҕарабыт Эһиэхэ күн сиригэр баар бары кэрэни, кэтит кэскиллээх олоҕу, сытыы кылыс доруобуйаны, сириэдийэ турар силиһи, өрүү күндэлэс күннээх халлааны, куруук  дьоҥҥо-сэргэҕэ үтүө-истиҥ сыһыаҥҥытынан сирдэрбэккэ хайҕалы эрэ ылын, нэһилиэккит уонна улуускут култуурата сайдарыгар күүскүтүн ууран үлэлээҥ, доруобай уонна үөрэ-көтө сылдьыҥ!

 

Өйдүүбүн театр киһитин,

Түүн – күнүс түбүктээх үлэтин.

Билиҥҥи сайдыылаах үйэҕэ

Бар дьоннуун үлэлиир эрэйин.

Өйдүүбүн артыыс киһини

Түмүгэ көстүбэт үлэтин.

Төһөлөөх сүүрүүнэн – көтүүнэн

Көрөөччү махталын ыларын.

Билэбин талааннаах киһини

Дэгиттэр уус – уран дьоҕурун,

Барытын ытыска уурбуттуу

Бар дьоҥҥо утары уунарын

 

 

Любовь Шишигина — Сыралыма

 

Поделиться

Переход на предыдущую и следующую статью