Өксөкүлээх Өлөксөй аатынан норуоттар доҕордоһууларын дьиэтигэр үҥкүү, ырыа, муусука, кэрэ эйгэ түһүлгэтэ түстэннэ.

 

 

Саха Өрөспүүбүлүкэтин үтүөлээх, норуодунай артыыстара Екатерина уонна Алексей Егоровтар 2017 сыллаахха айылҕа харыстабылыгар анаан туруорбут бырайыактара  бары өттүнэн туһалаах буолла. «Сардаана сибэкки» мюзикл чахчы даҕаны оҕону, улахан да дьону айылҕаны харыстыырга үөрэтэр.

 

 

Сүрүн оруолу Сардаана сибэккини «Сырдык сүүрээн» устуудьуйа тэриллиэҕиттэн сылдьыбыт Алена Домотова Саха гимназиятын үөрэнээччитэ ис дууһатыттан оонньообута тута көрөөччү хараҕар быраҕылынна.

 

 

Кураан эмээхсини оонньообут үрдүк, улахан сыанаҕа тахса үөрэммит артыыс быһыытынан Күөрэгэй Егорова бэрткэ кыайа – хото оруолугар киирэн оонньоото. Бары өттүнэн табыллыбыт күүстээх оруол буолан биэрдэ. Күөрэгэй быйыл оскуоланы бүтэрэн олох киэҥ аартыгар тахсарыгар, өссө үрдүктэн – үрдүк ситиһиилэри дабайарыгар баҕарыаҕыҥ!

 

 

Дина Максимова таҥара кийиитэ оруолун бэрт чэпчэкитик туттан – хаптан бэйэтин оруолун көрөөччүлэргэ итэҕэтиилээхтик тириэртэ.

 

 

Кэрэ эйгэҕэ анаан суруйбут ааптар Дмитрий Наумов бу айымньыны суруйан бүттүүн Сахабыт дьонугар улахан бэлэх уунна. Мюзиклы сыанаҕа туруорар кэрэ эйгэҕэ сыстыбыт дьон билэр буолуохтааххыт. 70 – ча оҕоҕо араас кустук өҥнөөх таҥаһы тигэн ойуулаан – дьүһүннээн сыанаҕа таһаарар арыынан – сыанан аҕаабат. Онно эбиитин уот – күөс, сценография, муусука айыллан, чочуллан тахсара чахчы кэрэ көстүү, ол гынан баран  элбэх харчыны эрэйэр. Хата дьолго, айар куттаах дьоммутун  Екатерина, Алексей Егоровтары  өйөөн, бырайыактара олоххо киирэригэр үп – харчы көрүллүбүтэ. Бу бырайыак «Сыл бастыҥ бырайыага» анал ааты ылбыта.

 

 

Алексей Егоров маннык кэпсиир: «Сардаана сибэкки» мюзиклбыт премьералара олус ситиһиилээхтик аастылар. Биһиги музыка эйгэтин дьонноро син элбэҕи көрдүбүт – иһиттибит буолан баран маннык, бары өттүнэн сиппит – хоппут оҕолор бэйэлэрэ оонньуур музыкальнай көстүүлэрэ Сахабыт сиригэр өссө тура илик… Бу сыралаах, дуоһуйуулаах үлэбитин ааспыт премьераларга көрөөччүлэр олус дуоһуйа, сөҕө – махтайа, оҕолор эмиэ да ытыы, эмиэ да күлэ – үөрэ көрбүттэрэ… Мюзикл финалыгар дьон – сэргэ туран эрэ таһыммыттара, дохсун ытыс тыаһынан уруйдаабыттара, сөптөөх хайысханы бары тутуһан үлэлээбиппит түмүгэ – дии саныыбыт. Мюзикл ырыаларын уолаттарым Харысхан, Өркөн уонна мин А.Егоров суруйбуппут. Ырыалар, үҥкүүлэр доҕуһуолларын, Лэкиэс, М.Кобяков, Серафим, Харысхан оҥорбуттара. Үҥкүүлэри «Сандал» бөлөх салайааччыта Сардана Катакова туруорбута. Мюзикл сценографиятын Саха тыйаатырын кылаабынай худуоһунньуга М.Егоров олус интириэһинэй гына тобулан оҥорбута. Бу улахан көстүүгэ 70- ча көстүүм дизайнер – художник И Кузьмина эскизтэринэн тигиллибитэ. Былырыын үс улахан республиканскай граннары кыайаммыт бу мюзиклбыт күн сирин көрбүтэ. Дьэ, онон доҕоттоор, бу сахаларга биһиэхэ аан бастаан идэтийии таһымыгар туруоруллубут оҕолорго бастакы мюзикл буолар!

 

 

«Сардаана сибэкки» мюзикл төрдүс төгүлүн көрдөрүллэн ситэн – хотон биэрдэ, киэҥ эйгэҕэ таҕыста. Ким көрбөтөх, ким көрбүт атын хараххытынан аны күһүн Өксөкүлээх Өлөксөй аатынан норуоттар доҕордоһууларын дьиэтигэр аартыктаах айар үлэ саҕаланнаҕына кэлэн көрөргүтүгэр ыҥырабыт.

 

Сыралыма