2018-11-14

«Олоҥхо Ассоциацията» уопсастыбаннай тэрилтэ Сүбэтин киэҥ ыҥырыылаах мунньаҕа

Просмотров: 637

 

Сэтинньи 12 күнэ Өксөкүлээх Өлөксөй аатынан норуоттар доҕордоһууларын Дьиэтигэр «Олоҥхо Ассоциацията» уопсастыбаннай тэрилтэ Сүбэтин киэҥ ыҥырыылаах уочараттаах мунньаҕа тэрээһиннээхтик буолан ааста.  Мунньахха 5 боппуруос тула наадалаах кэпсэтии таҕыста:

 

Өрөспүүбүлүкэтээҕи Олоҥхо декадатын ыытыы туһунан боппуруоска иһитиннэриини Олоҥхо Ассоциация вице-президенэ Мария Васильевна Турантаева оҥордо.

 

 

2019 с. Нам улууһугар ыытыллар өрөспүүбүлүкэтээҕи Олоҥхо ыһыаҕар бэлэмнэнии туругун туһунан боппуруоска иһитиннэриини «Нам улууһа» МТ дьаһалтатын баһылыгын бастакы солбуйааччыта Николай Анатольевич Соловьев оҥордо.

 

Өрөспүүбүлүкэтээҕи Олоҥхо ыһыахтара салгыы ыытыллар графиктарын бигэргэтии боппуруоһун  Олоҥхо Ассоциация 1 вице-президенэ Елена Николаевна  Протодьяконова туруорда.

 

 

Сыл түмүгүнэн туттарыллар Саха Өрөспүүбүлүкэтин култууратын уонна духуобунай сайдыытын олоҥхоҕо анал бириэмийэтигэр кандидатуралары Олоҥхо Ассоциация 1 вице-президенэ Елена Николаевна  билиһиннэрдэ.

 

«Олоҥхо кыһата» инновационнай бырайыак туһунан юоппуруоска иһитиннэриини бырайыак автордара: ф.н.к., Саха Өрөспүүбүлүкэтин норуоттарын култуурунай нэһилиэстибэлэрин Киинин салайааччыта Агафья Еремеевна Захарова, РФ дизайнердарын Сойууһун чилиэнэ Ариан Арианович Ермолаев оҥордулар.

 

Бу боппуруостарга киэҥ кэпсэтии таҕыста. Мунньах  кыттыылаахтара санаа атастаһыыларын түмүгэр быһаарыы ылылынна. Бастакы боппуруоска,  Өрөспүүбүлүкэтээҕи Олоҥхо декадатын ыытыы былаана бигэргэтилиннэ. Култуура, үөрэх, наука тэрилтэлэрэ уонна уопсастыбаннай түмсүүлэр Олоҥхо декадата тэрээһиннээхтик ааһарын хааччыйалларыгар этилиннэ. Олоҥхо декадата ыытыллар кэмигэр тэрилтэлэр, Олоҥхо Ассоциациятын улуустааҕы филиалларын  ыытар үлэлэрин радионан, ТВ-нан, хаһыатынан киэҥник сырдатар үлэни тиһигин быспакка ыыталларыгар уонна сырдатыы медиа-планын оҥорон улуустарга тарҕаталларыгар эбээһинэстэннилэр (эпп. Власьева М.Н., Избекова Е.И., Маркова Т.А., Бочонина В.И.). Олоҥхо Декадатын түмүгүн таһаарыыга суолталаах, тэрээһиннээх үлэни ыыппыт тэрилтэлэри бэлиэтииргэ этилиннэ. Улуустааҕы филиалларга хаһыаттарынан (эпп. Т.А. Маркова), радионан (эпп. М.Н. Власьева), телевидениенан (эпп. Е.И. Избекова, В.И. Бочонина) сырдатыыга анаммыт эппиэттээх сүрүннээччилэр информацияларын Олоҥхо Ассоциациятын уонна “САХА” көрдөрөр-иһитиннэрэр компания холбоһуктаах мунньаҕар 2019 сыл, олунньу ыйга истэргэ быһаарылынна.

 

Иккис боппуруоска, Олоҥхо Ыһыаҕын көрсө Нам улууһун олоҥхотун уонна олоҥхоһуттарын чинчийиини  салгыы дириҥэтэн ыыталларыгар, олоҥхо тиэкистэрин бэчээккэ бэлэмнээһини былааҥҥа толору киллэрэллэригэр Гуманитарнай чинчийии уонна хотугу аҕыйах ахсааннаах норуоттар проблемаларын чинчийэр институт научнай сотрудниктарыттан көрдөһөргө этилиннэ. Ыһыахха Олоҥхо түһүлгэлэрэ үрдүк таһымнаахтык үлэлиир усулуобуйаларын бары өттүнэн эрдэттэн тэрийэн, хонтуруолга тутарыгар Нам улууһун Олоҥхо Ассоциациятын филиала (сал. И.С. Новиков) эбээһинэстэннэ.

 

Ґһүс боппуруоска, Өрөспүүбүлүкэтээҕи Олоҥхо ыһыахтара салгыы ыытыллар графиктара биир санаанан бигэргэтилиннэ: 2020 с. – Өлүөхүмэ ул.;  2021 с. – Амма ул.; 2022 с. — Үөһээ Бүлүү ул.; 2023 с. – Кэбээйи ул.; 2024 с. – Өймөкөөн ул.; 2025 с. – Муома ул.

 

Төрдүс боппуруоска, 2018 сыл түмүгүнэн туттарыллар олоҥхоҕо анал бириэмийэлэргэ кандидатуралар ааттаннылар. Ол курдук, бастыҥ олоҥхону толорооччу – Лазарева Сусанна Васильевна (Чурапчы улууһа); бастыҥ олоҥхоҕо уһуйааччы – Лугинова Зинаида Петровна (Уус Алдан улууһа; бастыҥ олоҥхону тарҕатааччы – Иванова Евдокия Николаевна (Мэҥэ Хаҥалас улууһа); Олоҥхо мецената – Осипов Олег Дмитриевич, Захаров Петр Егорович (Таатта улууһа); бастыҥ үлэлээх Олоҥхо Ассоциациятын филиала – Сунтаар улууһа (салайааччы Кобельянова Мария Васильевна).

 

Бэһис боппуруоска, «Олонхо кыһата» инновационнай бырайыак туһунан ааптардар А.Е. Захарова, А.А. Ермолаев иһитиннэриилэрин мунньах кыттыылаахтара биһирээтилэр. «Олонхо кыһата» бырайыак сааһыланан, ситэн-хотон дьон-сэргэ ылыннаҕына, норуот олоҕор улахан суолталаах буолуохтааҕа өйдөнөр. «Олонхо кыһата» инновационнай бырайыагы олоххо киллэриигэ Олоҥхо Дьиэлэрэ, Олоҥхо Ассоциациятын филиаллара тиһиктээх үлэни ыыталларыгар быһаарыы ылылынна.

 

 

Мунньах кыттыылаахтара бииргэ үлэлииргэ санааларын этэн, өрө көтөҕүллэн тарҕастылар.

 

Елена Протодьяконова

Поделиться

Переход на предыдущую и следующую статью