Күндээрэ тыгар күлүм чаҕыл күннээх, уруйдаах илин халлаан Улуу урааҥхай омуга уутуйан   үөскээбит, улууканнаах дьоннордоох илбис Ийэ тыл ииппит төрөөбүт төрүт тыл төлкөлөммүт, үс саханы үөскэтэн элбэппит,  түөрт саханы төрөтөн тэниппит   Сахабыт сирин саамай бөдөҥ Мэҥэ – Хаҥалас улууһа төрүттэммитэ 85, Манчаары Баһылай 210 сылларын туоһулуур үбүлүөйдэригэр, «Ким да умнуллубат, туох да умнуллубат» Улуу кыайыы 70 сылыгар  уонна 2015 сыл Россияҕа литература, Саха сиригэр урбаанньыт сыла биллэриллибитинэн ырыаҕа ылламмыт, хоһооҥҥо хоһуйуллубут Мэҥэ нэһилиэгин Балыктаах бөһүөлэгин айар талааннаахтара, култуура уонна спорт кыттыылаахтара Хаптаҕай дьоһун мааны дьонугар ыалдьыттаатылар. Быйыл култуура уонна спорт эстафетата 59-с төгүлүн ыытылынна. Бу тэрээһин нэһилиэнньэ бары араҥатын хабар маассабай тэрээһин буолар. Балыктаахтар сүрдээх тэрээһиннэхтэрин, спортка, уус – уран самодеятельноска бэлэмнээхтэрин көрдөрдүлэр. Концерт 1ч 29 м. биир тыынынан хас биирдии нүөмэр бэйэ – бэйэлэриттэн ситимнэһэн чаҕылхайдык көрдөрүлүннэ, концерт темата, идеята толору арылынна. Режиссер Валерия Михайлова хореограф идэлээх эрээри көрөөччүлэри соһутар, сонун хайысханы киллэрбитэ харахха быраҕыллар. Үҥкүү, фольклор коллектива, Дьулус Кычкин үҥкүүтэ,  Лена Владимирова ырыата   үрдүк сыанабылы ылыан ылла. Андрей Стручков солота, Антонина Иван Прибылыхтар,  оскуола учууталларын литературнай ааҕыылара, хор биһирэннэ. Концерт уопсай баала 4,12 буолла. Дьэ, онон Мэҥэ – Хаҥаластарга эстафета былааҕа күөрэччи көтөҕүллэн салгыы атын нэһилиэккэ айанныыр.

 Сыралыма