«Дьиэрэһийэр дэгэрэҥ» аһаҕас республиканскай дэгэрэҥ ырыа түһүлгэтэ ахсынньы ый 9 күнүгэр Амма улууһун Амма сэлиэнньэтигэр Соморсун нэһилиэгин көҕүлээһининэн ыытылынна. Барыта 15 оҕо, эдэр ыччат ону тэҥэ 6 улахан дьон Амма,Ньурба, Таатта, Уус Алдан улуустарыттан уонна Дьокуускай куораттан кыттыыны ыллылар. Дьүүллүүр сүбэҕэ Х.Максимов Фондатын чилиэннэрэ: Христофор Максимов улахан уола Иннокентий Христофорович Максимов, Өксөкүлээх Өлөксөй аатынан Норуоттар доҕордоһууларын дьиэтин сүрүн специалиһа, Фонда чилиэнэ Адамова Саргылана Саввична Адамова, ”Ымыылаах чыычаах” үрүҥ көмүс бэлиэ хаһаайына Николай Васильевич Протасов уонна Фонда эдэр чилиэнэ, Х.Максимов 100 сыллаах өрөгөйдөөх ыһыаҕын Гран-при хаһаайына Василий Васильевич Новоприезжай.

 

 

Бу күн кыттааччылар дэгэрэҥ хайысхаҕа икки ырыанан күөн-көрүстүлэр: биир ырыалара Х.Максимов, иккис ырыалара сахалыы дэгэрэҥ ырыа. Киһи үөрэрэрэ баар, бу киэһэ Х.Максимов олох ыллана илик ырыалара “Таптыыр уолбар”, “Төһүү дьон холкуостар” ылланнылар. Ону тэҥэ: “Тапталлааҕым аата”, “Мэттэкэ-Тэттэкэ”, “Эйэ холууба”, “Билбитим алаастан”, “Отчуттар”, “Ахтылҕан”, “Учууталга”, “Биригэдьиир Марыына”, “Саҥа уоттар”, “Бокуойа суох Боккуойа”, “Өндөрүүскэ тиэтэйбэт”. Саха сирин мелодистара Серафим Павлов, Туяра Сафронеева, Петр Петров, Павел Семенов, Иннокентий Никифоров, Анастасия Варламова, Милена Борисова, Аскалон Павлов, Виталий Очиров уонна норуот ырыалара ылланан көрөөччү кутун туттулар. Амматтан төрүттээх эдэр ырыа айааччылар Милена уонна Туяра ырыалара ылланан, аммалар айар-тутар эдэр ыччаттаах эбит диэн өйдөбүлү ыраахтан кэлбит кыттааччылар истэн, билсэн бардылар.

 

 

Хомойуох иһин улуус нэһилиэктэриттэн кыттыы мөлтөх, саатар биирдии кыттааччы бэлэмнэнэн кэлэн кыттыыны ылбыта буоллар, күөн-күрэһи лаппа киэргэтиэ, ис хоһоонун дириҥэтиэ этэ дии санаатым биир бэйэм. Амматтан Абаҕа, Соморсун, Чакыр, Мээндиги, Сулгаччы, Покровка, Сэргэ Бэс эрэ көхтөөхтүк кытыннылар. Оннооҕор бачча тымныыга, ыраах диэн кэтэҕэмэйдэммэккэ, анаан-минээн Христофор Трофимович Максимов талааныгар сүгүрүйэн, Ньурба курдук сиртэн кэлэн ыллаан-туойан барбыттара киһини үөрдэр, долгутар.

 

 

Күөн-күрэс түмүгүнэн кыайыылаахтарынан буоллулар:

 

Оҕолорго (12-18 саастаахтар): 1 лаурет-Ньургун Эверстов (Абаҕа), 2 лауреат- Семен Борисов (Соморсун), 3 лауреат- Иван Колодезников (Кэптэни), 1 диплом- Роберт Гаврильев(Дьокуускай), 2 диплом- Карина Лебедева (Соморсун), 3 диплом- Ванесса Васильев (Дьокуускай). Анал ааттар: “Эйээрэр кылыһах”- Олеся Антонова (Ньурба), “Киристэпиэл кэскилэ” – Оксана Жиркова(Мэндиги), Кэскилээнэ Протасова (Соморсун).

 

 

Улахан дьоҥҥо: Гран-при- Василий Местников (Кэптэни), 1 лауреат- Ньургуяна Никитина (Найахы), 2 лауреат- Вера Неустроева (Абаҕа), 3 лауреат- Роза Винокурова (Сулгаччы), 1 диплом- Матрена Порядина (Таатта), 2 диплом – Владимир Дедюкин (Покровка).

 

 

Дьүүллүүр сүбэ күөн-күрэстэр быыстарыгар кыттааччылары кытта сүбэ мунньах, санаа атастаһыытын ыытта, кэлэр тэрээһиннэр тустарынан баҕа санаалары иһиттэ. Ол курдук, дэгэрэҥ ырыаҕа ситимин быспакка Амма сиригэр-уотугар нэһилиэктэринэн күөн-күрэстэри ыыта туралларыгар, Х.Максимов өссө да ыллана илик ырыаларын киэҥ эйгэҕэ таһааралларыгар баҕа санааларын эттилэр. Номнуо бу ыстатыйа тахсыан иннинэ Уус-Алдан Кэптэнититтэн үчүгэй сурах кэллэ “Бу кэлэр сыл сааһыгар “Фондалар дэгэрэҥ күөн-күрэһин биһиэхэ ыытыҥ” диэн. Ону үөрүүнү кытта ыытар буоллубут. Онон дьэ, аммалар Уус Алдан Кэптэнитигэр ох курдук оҥостон кэлэн дэгэрэҥ түһүлгэтигэр ыллаан-туойан киэргэтиҥ, талааҥҥытынан уус алданнары сөхтөрүн диэн ыҥырабын.

 

 

Түгэнинэн туһанан Соморсун нэһилиэгин аҕа баһылыгар Алексей Юрьевич Кононовка, культура дьиэтин үлэһиттэригэр, чуолаан элбэх оҕону иитэн-такайан таһаарбыт Николай Протасовка, күөн-күрэһи иилээн-саҕалаан ыыталларыгар көмөлөспүт Ф.Потапов аатынан Культура дьиэтин үлэһиттэиргэр ХРИСТОФОР МАКСИМОВ ФОНДАТЫН ААТЫТТАН МАХТАЛБЫТЫН ТИРИЭРДЭБИТ.

 

 

Амма сирэ-уота талааннарынан баай, эдэр ыччата түмсүүлээх, ырыа-тойук аргыстаах, эйэлээх.

 

 

Амма культурата дириҥ силистээх-мутуктаах, историялаах. Ону харыстыыр, чэчирэтэр биһиги иэспит, үрдүк сорукпут буоларын умнумаҥ!

 

СР культуратын үтүөлээх үлэһитэ Алтан Кыыс,

 Дьокуускай-Амма, ахсынньы ый 10 күнэ 2018 с.