Быйыл ыытыллар СР искусствотын үтүөлээх деятеля, режиссер, сценарист, автор, педагог Иван Иванович Бурцев аатынан «Дьээбэрэҥ-2015» республикатааҕы көр-күлүү күрэҕэ Улуу Кыайыы 70 уонна Россия литературатын сылларыгар ананар.

Саха норуотун көрүн-күлүүтүн көҕүлүттэн туппут, үгэскэ кубулуйбут тапталлаах күрэхпит Муус устар 1-кы күнүгэр Өксөкүлээх Өлөксөй аатынан норуоттар доҕордоһууларын дьиэтигэр ыытыллыаҕа. Бу иннинээҕи күн кыттааччылары сүүмэрдээһин буолуоҕа. Күрэххэ хас биирдии киһини быара суох ыытар, сүргэни көтөҕөр бэтиэхэлээх туруоруулары Сахабыт Сирин норуотун театрдара, биирдиилээн кыттааччылар, театральнай кэллэктииптэр уо.д.а. бэлэхтиэхтэрэ.

«Дьээбэрэҥ» ‒ көргө-күлүүгэ сыһыаннаахтар, айылҕаттан айдарыллыбыт айар дьоҕурдаахтар түмсэн күөн көрсүһэр, күрэхтэһэр, бастыҥнары талан ылар, үөрэр-көтөр түһүлгэлэригэр кубулуйбут, эдэр саҥа талааннары таба тайанан айар үлэ аартыгар үктэннэрэр, дьон-сэргэ сөбүлээн сылдьар, астына көрөр, дуоһуйа сынньанар  көр-күлүү республикатааҕы  күрэҕэ.

«Дьээбэрэҥ-2015» быйылгы көрүүтэ Россияҕа биллэриллибит Литература уонна Улуу Кыайыы 70 өрөгөйдөөх сылыгар анаан ыытылларынан кыттааччылар репертуардарыгар литература классиктарын айымньыларынан, эбэтэр кинилэргэ олоҕурбут туруоруулар  уонна сэриини, фашизмы утары, эйэлээх-дьоллоох олоҕу, доҕордуу сыһыаны уруйдуур айымньыларынан кыттыы ордук биһирэниэҕэ.

Бу эрэ күн кыттааччылар талан ылбыт көрүҥнэригэр, ол эбэтэр көрдөөх кэпсээн, хоһоон, чабырҕах, үгэ, монологтар, сценкалар, конферансье, комедияттан быһа тардыылар, көрдөөх ырыалар, үҥкүү, пародия, пантомима, клоунада, фокус жанрдыранынан туруоруулары көрдөрүөхтэрэ.

«Дьээбэрэҥ»  көр-күлүү көрүүтүн республикатааҕы дьүүллүүр сүбэ  сыаналаан баран Гран-при, номинациялар уонна Анал бириистэр кыайыылаахтарын быһаарыахтара.

Билсиһэр телефоннар:32-86-62, 89644230345 ‒ тэрийэр кэмитиэт.