«Арчы» дьиэтигэр олоҥхо декадатын чэрчитинэн Чөркөөх сириттэн – уотуттан куорсун анньынан тахсыбыт Ийэ олоҥхоһут, ЮНЕСКО стипендиата, алгысчыт, Таатта, Эдьигээн улуустарын уонна  Чөркөөх нэһилиэгин бочуоттаах гражданина, үлэ-тыыл ветерана П. Е. Решетников – Көһөҥө Бүөтүр төрөөбүтэ 90 сылыгар аналлаах  «Олоҥхо дойдутунуу кэрэ олоҕу баҕарабын…» ахтыы киэһэтэ ыытылынна.

П. Е. Решетников – Көһөҥө Бүөтүр амарах аҕа, билиилээх учуутал, сатабыллаах салайааччы, ситиһиилээх спортсмен, дэгиттэр талааннаах артыыс, айылҕаттан айдарылаах алгысчыт, сээркээн сэһэнньит, умсугутуулаах уһуйааччы, Ийэ олоҥхоһут.Төрөппүт кыыһа Розалия Петровна Докторова, аймахтара, сиэннэрэ, аймахтара, бииргэ алтыспыт атастара- доҕотторо, биир дойдулаахтара, олоҥхо эйгэтигэр үлэлэспит дьоно – сэргэтэ бары өттүнэн сырдатан ахтан – санаан аастылар.

Киэҥ ис хоһоонноох тэрээһини  Боппоенова Мария Гаврильевна салайааччылаах Дьокуускайдааҕы култуура  уонна искусство колледжын устудьуоннара сэргэхтик, үрдүк таһымнаахтык ситэрэн – хоторон биэрдилэр.