«Булчут кутаата» Просмотров: 1387
Улуу кыайыы 70 сылыгар аналлаах Мэҥэ-Хаҥалас Балыктааҕар сааскы сандал күн ыам ыйын ыраас халлааныгар сүрдээх үчүгэй булчуттарга аналлаах «Булчут кутаата» – диэн тэрээһин ыытылынна. Эр дьон тоҕуоруһан мустан биэстии киһи буолан хамаанда тэринэн булка сатабыллаахтарын көрдөрдүлэр. Түһүмэхтэргэ 100 м сүүрүү, сыырга сүүрэн тахсан сыал ытыы, 20 киилэни сүгэн баран 50 м сүүрүү, чэй өрүүтэ, тэриэлкэ ытыыта, МЦ 21 сааны ыһыы уонна таҥыы, мэһэйи туорааһын, сиэрдийэ суоруу, граната быраҕыы, боппуруостарга эппиэт – викторина. Үлэ бэтэрээнэ байанайдаах булчут Цыпандин Николай Алексеевич бирииһигэр экстрим ытыыга күрэхтэстилэр, ол аата кыҥаабакка туһаайан ытыы эбит. Манна уонча киһи бэйэтин холонон көрдө. Улахан дьоҥҥо Ι миэстэни – Сотников Гаврил, ΙΙ – Дохунаев Петр, ΙΙΙ – Захаров Михаил, эдэрдэргэ Ι миэстэни – Гоголев Гоша, ΙΙ – Цыденжапов Вася, ΙΙΙ – Бочкарев Станислав ыллылар. Бу күрэххэ Николай Алексеевич аатын иҥэрэр күннэригэр Орто эбэҕэ икки кус уста сылдьарын көрөн «үөлээннээхтэрэ оҕонньор байанайын көрдөрдө» — дэстилэр.
Саамай интириэһинэйэ иккис күн буолла. Сэрии ветерана Стручков Дмитрий Григорьевич аатынан спортиҥҥа күрэхтэһии, бирииһи барытын оҕолоро, аймахтара, сиэннэрэ олохтоотулар. Ι миэстэни – Ноговицын Николай бирииһэ электростанция, ΙΙ миэстэни – Стручков Петр бирииһэ бензопила штиль, ΙΙΙ миэстэни Стручков Андрей бирииһэ циркулярнай эрбии тутан үөрүүлэрэ үксээтэ.
Сэрии ветераннарын ааттарынан Мохначевский Ефим Лонгинович, Цыпандин Алексей Николаевич, Мохначевский Илья Апполонович, Стручков Дмитрий Григорьевич, Цыпандин Петр Васильевич, Сотников Андрей Ильич, Артемьев Сергей Михайлович, Скрябин Василий Иванович оҕолоро аймахтара бириис бөҕө туруордулар. Кадровай булчуттар Сотников Василий Егорович, Черкашин Сергей Гаврильевич¸Чалкин Семен Антонович ааттарынан бириис туруорулунна. Маны таһынан тэрилтэлэр бары спонсардаатылар.
Любовь Шишигина – Сыралыма.