Самаан сайын салаллар кэмигэр, ыам ыйын 21-с күнүгэр Норуоттар доҕордоһууларын дьиэтигэр  улуу тойуксут, саха төрүт ырыатын-тойугун түсчүтэ, РФ искусстватын үтүөлээх деятелэ С.А.Зверев-Кыыл Уола төрөөбүтэ 115-сылыгар анаммыт IV-с республиканскай «Өбүгэ быстыбат ситимэ» фестиваль-күөн-күрэс ыытыллыаҕа.

Бу эрэ күн Сахабыт Сирин араас муннугуттан чабырҕаҕы, тойугу, норуот ырыатын (дэгэрэҥи) толороруонна хомуска оонньуур дьон кыттыыны ылыахтара, бэртэрин былдьаһыахтара. Сахалыы сайаҕас тылынан ылбаҕай ырыа ылланыа, кылыһахтаах тойук дуораһыйыа, алыптаах хомус дьүрүһүйүө…

Түмүккэ дьүүллүүр сүбэ көрүҥүнэн көрөн анал ааттары иҥэриэҕэ, туоһу суруктары туттарыаҕа. Маны таһынан киинэ уһуллан күөн-күрэс бастыҥнара үйэтитиллиэхтэрэ.

Сайаапканы ыам ыйын 19 күнүгэр диэри маннык аадырыска ыытаҕыт: Поярков уул, 4 (129 каб.), тел./ факс 32-80-77, балаһыанньаны Өксөкүлээх Өлөксөй аатынан норуоттар доҕордоһууларын дьиэтин центркультуры.рф сайтыгар көрүөххүтүн сөп.

Ол киэһэ «Күөххэ үктэнии алгыһа» диэн сайын саҕаланыытын түстүүр ураты дьоро киэһэ буолуоҕа. Манна алгысчыт Алгыс Уйбаан, саха куттаах ураты ырыаһыттар Саарын, Виталий  Очиров, Алексей Потапов, «Өбүгэ быстыбат ситимэ» күөн-күрэс кыайыылаахтара уонна кырыымпанан оонньуур бөлөх кыттыыны ылыахтара.