Быйыл Саха сиригэр  Дьокуускай куоракка Сайсары күөл үрдүгэр  Аар Моҕол ураһа туоһунан тигиллэн туруохтааҕын радионан уонна телевизорынан кэпсээбиттэрин элбэҕи көрдүбүт-иһиттибит.  Балаҕан ыйын 25-26 күннэригэр  Дьокуускай куоракка  бу ураһа тигиитин тула норуот маастара, Государственнай бириэмийэ лауреата Б.Ф.Неустроев-Мандар-Уус кыттыылаах Комдрагмет дьиэтигэр быыстапка, семинар-практикум  буолан ааста. Биһиги улууспутуттан норуот маастара Семен Черноградскай уонна туоһунан интэриэһиргээччилэр сырыттылар. Тэрээһин түмүгүнэн 9 миэтэрэ үрдүктээх 12 миэтэрэ кэтиттээх туос ураһаны  улуустарынан тигиэҕин-диэн ыҥырыы таһаардылар.

Алтынньы 7 күнүгэр улуус культурата көҕүлээһининэн Покровскай куоракка туоска  үлэлиир маастардар мустан    моҕол ураһаны тигэн туруорарга сүбэлэстилэр. Семинары иилээн-саҕалаан   Нөмүгү олохтооҕо С.С.Черноградскай  ыытта. Семен Степанович   санаатын маннык  үллэһиннэ :

«… Дьокуускай куоракка туруохтаах Моҕол ураһа тигиитигэр республика уран тарбахтаах маастардара бары кытталларын биллэрдилэр. Хаҥаластартан  20-чэ маастар үлэлииргэ сөбүлэстилэр. Икки-үс сыллаах үлэбитигэр Нөмүгү, Уулаах-Аан, Өктөм, Чапай, Күөрдэм, Тиит-Эбэ, Покровскай, Дьокуускай куорат маастардара  кыттыыны ылыахтара. Быйыл тигэр саппытын бэлэмниэхпит. Эһиилгиттэн туоспутун хастаан, кырааскалаан бэлэмниэхпитин наада. Элбэх туос наада буолара буолуо, онон улуустан көмө көрдүүбүт.”

Галина Семенова