Бу күннэргэ Аллараа Бэстээххэ Мэҥэ – Хаҥалас улууһугар Олоҥхо дьиэтигэр устар ууну сомоҕолуур уус-уран, мандар тыллаах – өстөөх, айылҕаттан бэриллибит мындыр өйдөөх – санаалаах, талба талааннаах, күүстээх – уохтаах, сырдык ыраас санаалаах ытык өбүгэлэрбит барахсаттар эттэригэр – сииннэригэр ийэ тылларын кытары иҥэриммит баайдарын – Улуу олоҥхобутун, көлүөнэттэн – көлүөнэҕэ кэнчээри ыччаппытыгар кэс гынан хаалларбыттарын, аныгы үйэ дьоно суолтатын өйдөөн, дириҥ ис хоһоонун сыаналаан, сөҕөн – махтайан бүтүн аан дойду түһүлгэтигэр дуоратан 2006 с. ЮНЕСКО – ҕа киллэрбиппит, сахабыт сиригэр 10 сыллаах Олонхо сыла биллэрбиппит аатыгар дьоһун киэһэ тэрилиннэ. Кэлбит ыалдьыттары «Айыллыы» бөлөх далбар хотуттара айыы аһынан уохтаах кымыһынан, арыылаах алаадьынан, буспут сыалаах этинэх айах тутан көрүстүлэр.

Үөрүүлээх түһүлгэбитигэр түҥ былыргы өбүгэлэрбит барахсаттар үйэлэргэ ситии быалыы ситимнээн хаалларбыт олоҥхотун үс көлүөнэ толорбутун иһиттибит. Ол курдук, Захаров Аркадий Михайлович, Григорьев Иван Алексеевич  Мэҥэ–Хаҥалас улууһун тарбахха баттанар олоҥхоһуттара, Өрөспүүбүлүкэҕэ ыытыллар олоҕурбут ньыманан олоҥхону толорууга күөн – көрүүлэр кыайыылаахтара, Исаков Валентин Гаврильевич Олоҥхо тыйаатырын артыыһа, биллииллээх, туспа суоллаах — иистээх олоҥхоһут. Орто көлүөнэттэн Степанова Аксинияны – олоҥхоһут Степанов Николай Иванович – Ноорой сиэнин, удьуор олоҥхону толорооччуну, улуустааҕы Олоҥхо дьиэтин фольклорга исписэлииһин сэҥээрдибит уонна Аммосова Мусяны, кырачааннарбыт Тарабукина Сандаараны, Аллараа – Бэстээх оҕо уһуйаанын дьиэтин иитиллээччилэрин иһиттибит.

Ситии быа курдук ситимнэнэн олоҥхобут барахсан күн бүгүҥҥэ диэри тиийэн кэлбитин туоһулаан эҕэрдэ тылы эттилэр: Мэҥэ – Хаҥалас улууһун дьокутааттарын сэбиэтин бэрэссэдээтэлэ Андрей Михайлович Находкин, Өксөкүлээх Өлөксөй аатынан норуоттар доҕордоһууларын дьиэтин информационнай – маркетинговой салаа салайааччыта Любовь Егоровна Шишигина, Хотугулуу – Илиҥҥи федеральнай университет Олоҥхо салайааччыта Варвара Валерьевна Обоюкова, Мэҥэ – Хаҥалас улууһун култуураҕа уонна духуобунаска сайдыы управлениятын солбуйааччы начальнига Надежда Афанасьевна  Максимова, үөрэх управлениятын солбуйааччы начальнига Вера Аркадьевна Тимофеева. Олоҥхо дьиэтин дириэктэрэ Евдокия Николаевна Иванова.

Уруйдаах Олоҥхобут нэдиэлэтэ саҕаламмытынан эҕэрдэлиибит, үөрүүбүтүн үллэстэбит.Олоҥхобут барахсан үгүс үйэни уҥуордаан кэлэр кэнэҕэски ыччаттарын кэскиллэрин кэрэһэлии күргүөмнээхтик сайда – чэчирии турдун, дьоллоох олох тускута буоллун!