“Сайсары” ырыа народнай ансаамбыла 35 сыллааҕы үбүлүөйүгэр анаан Өксөкүлээх Өлөксөй аатынан норуоттар доҕордоһууларын Дьиэтин сыанатыгар «35 сыл ырыа ыллыгынан» диэн кэрэ бэлиэ киэһэни бэлэхтээтэ.

“Сайсары” ырыа народнай ансаамбылыгар араас идэлээх далбар хотуттар ыллыы-туойа сылдьаллар. Ол курдук “Сайсары” ансаамбыл араас күрэх кыттыылааҕа, кыайыылааҕа. Ансаамбыл араас омук тылынан ылланар ырыалардаах. Төрүттэммит күнүттэн элбэх сиргэ ыллаан Сахабыт сиригэр эрэ буолбакка тас дойдуга кытары дьон биһирэбилин ылбыта. 2008 сылтан ансаамбыл салайааччытынан Саха Өрөспүүбүлүкэтин культуратын туйгуна Светлана Константиновна Степанова үлэлиир.

Кэнсиэри Бүтүн Арассыыйатааҕы Ийэ күнүнэн эҕэрдэлээн туран, кэлбит ыалдьыттарга анаан С.Дадаскинов тылларыгар Н.Алексеева матыыбыгар  “Ийэбэр” диэн ырыаннан саҕалаатылар. Бу киэһэ 35 сыл устата ылламмыт, дьон сүрэҕэр хатаммыт уруккуну-хойуккуну санатар кэрэ ырыалар ылланнылар. Бу киэһэ ансаамбыл кыттыылаахтарын эҕэрдэлээтилэр: оҕо үҥкүү ансаамбыла “Сир симэхтэрэ”, “Далбар” ансаамбыл, “Сарыал” үҥкүү ансаабыла, “Талба” ансаамбыл. Саха сирин культуратын министерствотын аатыттан  махтал суругунан “За вклад в развитие культуры и искусства РС(Я)” Мария Макарова, “За вклад в развитие народного художественного творчества РС(Я)” бочуоттаах бэлиэтинэн Лидия Уарова, Наталья Другина уонна Татьяна Михайлова наҕараадаланнылар. Ансаамбыл саастаах бэтэрээннэригэр министр аатыттан махтал сурук, бэлэх туттардылар. Норуоттар ыккардыларынааҕы “Жизнь городов” (Москва) программа 2016 сыл сайыныгар Крым куоракка буолар норуоттар ыккардыларынааҕы фестивальга ансаамбылга босхо түһүү сертификатын туттарда. Дьокуускай куорат Дууматын аатыттан Руслан Петрович Неустроев 35 сыллаах үбүлүөйүнэн истиҥ тыллардаах эҕэрдэ суругун уонна ансаамбыл салайааччытыгар Светлана Степановаҕа бочуотнай сурук уонна бэлиэ знак туттарда. Кыайыы 70 сылыгар ансаамбыл көхтөөх кыттыыны ылбытыгар Дьокуускай куорат салалтатын аатыттан “70 лет Победы” бэлиэннэн ансаамбыл далбар хотуттара наҕараадаланнылар. Дьокуускай куорат Культуратын салалтатын аатыттан махтал суругунан уонна бэлэхтэринэн наҕараадаланнылар. Норуоттар политикаларын комитетын аатыттан эҕэрдэ сурук уонна “Дружба народов” үтүө бэлиэннэн Светлана Констанстиновнаны эҕэрдэлээтилэр. Өксөкүлээх Өлөксөй аатынан норуоттар доҕордоһууларын дьиэтин генеральнай директора Яна Викторовна Игнатьева истиҥ тылларынан эҕэрдэлээтэ уонна сахалыы сиэдэрэй көстүүмү тиктэрэллэригэр ансаамбыл салайааччытыгар гран туттарда. Ансаамбыл Далбар Хотуттарын коллегалара, чугас дьонноро, доҕотторо кэлэн эҕэрдэлээн, үөрдэн бардылар.

“Сайсары” ырыа народнай ансаамбылын 35 сыллааҕы үбүлүөйдээх дьоро киэһэтэ үрдүк таһымнаахтык ааста.

“Сайсары” ансаамбылын Өксөкүлээх Өлөксөй аатынан норуоттар доҕордоһууларын дьиэтин коллективын аатыттан эҕэрдэ тылларын уунабыт! Айар үлэҕитигэр үрдүк ситиһиилэри баҕарабыт. Дьоллоох, доруобай буолуҥ!