“Мин эһэм өтөҕөр

Турар эргэ-эргэ

Айах чороон көтөҕөн

Кубарыйбыт мас сэргэ…”

Маннык хоһоонунан Өксөкүлээх Өлөксөй аатынан норуоттар доҕордоһууларын дьиэтигэр айар куттаах поэт, норуот маастара, худуоһунньук, “Симэх” норуот искусствотын киинин салайааччыта Александр Николаевич Гоголев – Сатал Уус “Көҕүөр ойуу таабырына” диэн быыстапката аһылынна. Александр Николаевич хоһооннорун сахалыы уонна нууччалыы тылынан Культура колледжын устудьуоннарын, Былатыан Ойуунускай аатынан Саха академическай тыйаатырын артыыстарын Елизавета Потапова уонна Дмитрий Михайлов, Өксөкүлээх Өлөксөй аатынан норуоттар доҕордоһууларын дьиэтин генеральнай директорын бастакы солбуйааччытын Розалия Колосова уонна Любовь Ахметова толорууларыгар иһиттибит. Бу дьоро киэһэни тыыннаах хомус, флейта, кырыымпа тыаһынан доҕоһуоллаатылар: СР үтүөлээх артыыската, “Айархаан” бөлөх салайааччыта, поэтесса Альбина Дягтерева, Монголия Өрөспүүбүлүкэтин культуратын туйгуна, СР культуратын үтүөлээх үлэһитэ Балдорж Хуухээ, СР үтүөлээх артыыската, С.Зверев аатынан үҥкүү театрын оркестрын солиската Анна Томская.

Быыстапка арыллыытыгар норуот маастара Борис Федорович Неустроев – Мандар Уус, Норуоттар политикаларын государственнай комитетын дьону кытта үлэлэһэр отделын салайааччыта Игорь Семенович Ефремов, СР народнай суруйааччыта Семен Титович Руфов, СР народнай поэттара Рафаэль Багатайский, Василий Тарасович Сивцев, “Уус” народнай маастардар сойуустарын салайааччытын солбуйааччыта Семен Викторович Иванов, Өксөкүлээх Өлөксөй аатынан норуоттар доҕордоһууларын дьиэтин генеральнай директорын бастакы солбуйааччыта Розалия Ефимовна Колосова истиҥ-иһирэх эҕэрдэ тылларын Александр Николаевичка анаатылар.

Александр Николаевич олоҕор мэлдьи күһүн, кыһын, саас, сайын айылҕа араас көстүүлэрэ бэйэ-бэйэлэриттэн ситимнэнэн, айар үлэтэ араас көстүүлэрэ ураты туспа аартыктанан аар хатыҥ систэри, киэҥ толооннору уҥуордаан, үрдүк чыпчааллары дабайан үүнэ-сайда турарыгар баҕарабыт. Аал Луук маһын лабаата лаглайдын, силиһэ чиҥээтин! Дьол-соргу тосхойдун!

Александр Николаевич Гоголев – Сатал Уус “Көҕүөр ойуу таабырына” диэн быыстапкатын Өксөкүлээх Өлөксөй аатынан норуоттар доҕордоһууларын дьиэтигэр Омуктар культураларын хоһугар (галерея национальных культур. 1 этаж) ахсынньы 9 күнүттэн 20 күнүгэр дылы кэлэн көрөн, көҕүөр ойуу таабырынын таайыҥ!

Каасса: 32-82-96