«Олоҥхо дойдутун оҕотобун» бэстибээл тэриллибитэ номнуо 19 сыл ааһа оҕуста. Олоҥхону үөрэтиигэ туох – ханнык хамсааһын таҕыста?

Өссө”Олоҥхо” Ассоциацията тэриллиэн  иннинэ, Өксөкүлээх Өлөксөй аатынан норуот айымньытын фольклорга салаатын сэбиэдиссэйэ Сысолятина З.Г. көҕүлээһининэн , ”Олоҥхо дойдутун оҕотобун” диэн республикатааҕы олоҥхо күрэҕэ, оҕолору олоҥхоҕо сыһыарар, интэриэһиргэтэр сыаллаах, үлэтин саҕалаабыта. Бу тэрээһин үлэтин түмүгүн кэтээн көрөөһүнтэн, инникилээҕин уонна өссө сайдар, далааһыннанар кыахтааҕын толору итэҕэттэ. Ол курдук, оҕолор олоҥхоҕо интэриэстэрэ лаппа күүһүрдэ. Олоҥхону иҥэн – тоҥон чинчийэр хабааннаах киэҥ ырытыылары оҥорор буоллулар. Олоҥхону, олоҕурбут ньыманы тутуһан, ырыатын – тойугун ситэрэн – хоторон, чаастан ордук толорор ордук дьоҕурдаах оҕолор улуус аайы үксээн эрэллэрэ биһигини үөрдэр.

1997 сыл”Оҕо уонна олоҥхо” Программа тосхолунан үлэ саҕаланан  ол сыл  Саха Республикатын Президенин Гранын ылан, ”Олоҥхо дойдутун оҕотобун” фестиваль 4 сыл Дьокуускай куоракка П.А. Ойуунускай аатынан литературнай музейга, онтон кэнники сылларга улуустарынан ыытыллыбыта. Олоҥхону көннөрү олоҕорбут ньыманан толоруу, научнай дакылааттары истии, фестиваль иһинэн ыытыллаллар. Сылын ахсын оҕолор толорор дьоҕурдара сайдар. Бу фестиваль бэйэтэ туспа эйгэлээх, тыыннаах, дьиҥ чахчы олоҥхону сэргиир түһүлгэҕэ кубулуйда. Бу оҕолор ханнык баҕарар таһымнаах олоҥхону сатаан истэр, сэҥээрэрүчүгэй истээччилэринэн буолар кыахтаахтар. Бэйэтэ кэтээн көрөр экспертэрдээх. Кинилэртэн саамай киэн туттар дьоннорбут В.В. Илларионов, Г.С.Попова — Санаайа буолаллар. Бу чулуу эпосоветтар, олоҥхону олохторун тухары инники күөҥҥэ илдьэ сылдьар дьоммут буолаллар. Е.М. Поликарпова, Н.С. Толбонова, экспертэр — ГЧИ научнай сотрудниктара: Дьяконова Надежда Афанасьевна, ф.н. к. Мухоплева Светлана Дмитриевна, СГУ старшай преподавателлэрэ Федорорва Галина Гаврильевна оҕолор олоҥхону анааралларыгар, чинчийэллэригэр улаханнык көмөлөһөллөр, ааттаналлара наада дии саныыбын. Кинилэр курдук өбүгэлэрбит үйэлээх үгэстэрин өрө тутар дьоннор баар буолан бу биһиги олоҥхобут өрөгөйдүүр күнэ үүннэҕэ.

Оҕолору уһуйааччыларбытын ахтан ааһабыт ол курдук Вера Иннокентьевна Троеваны, Тарабукина Клавдия Максимовнаны, Иванова Светлана Тарасовнаны, Саха Республикатын үтүөлээх учууталын Никандр Прокопьевич Тимофеевы, Мария Васильевна Николаеваны, Диана Егоровна Тарабукинаны. Бу чахчы бастыҥ уһуйааннар оҕолор сайдалларыгар, дэгиттэр талааннаах буолалларыгар бары кыахтарын биэрэн туран үлэлииллэр. Маннык бастыҥ уһуйааннар баар буоланнар  оҕолорбут олоҥхолоон эрдэхтэрэ. Кинилэр уһуйар ньымалыгар үөрэнээри оҕолор сыл ахсын сааскы ылааҥыга  анайаннаан да биэрдэхтэрэ. Оҕолор сайдалларын кэтээн көрөр олус үчүгэй. Хаһан эрэ кыра кылааска үөрэнэ сылдьыбыт кырачаан оҕолор оскуоланы бүтэрэр сылларыгар кэлэн Кэрэ Куо, Уол Дуолан буолан олорон олоҥхолуура хайа баҕарар тэрийээччини үөрдэр.

Бэстибээл Олоҥхо түhүлгэтигэр мустубут бар дьоммутугар баҕарабыт олоҥхоhут оҕолор курдук эдэрдии эрчимнээх, чэгиэн – чэбдик бэйэлээх, дьол – соргу тосхоллоох, толкуйдаабыккытын тобула, санаабыккытын саргылыы сылдьын диэн алгыс бастыҥын аныыбыт.

Дьэ онон түмүкпэр этиэм этэ

Олоҥхолоон оҕонньоттор!

Олоҥхолоон кээспит олоҥхолорун, Олоҥхо уус – уран тылын, олоҥхо киэҥ киэлитигэр киллэрэн, оҕолорбутугар үөрэтэн, иһитиннэрэн «Олоҥхо дойдутун оҕотобун» ааппытын уларыйбат төлкөлөөн — урааҥхайдар дэтиэҕиҥ, самнан биэрбэт саргылаах саҥа сахалар буолуоҕуҥ!

Сыралыма