“Иэйии утума” быыстапкаҕа ыҥырабыт Просмотров: 2140
Самаан сайын салаллан, ыһыах кэмэ чугаһаан, сайаҕас санаалаах сахабыт дьоно, далбар хотуттар, тойон ньургуттар эр бэрдэрэ, кэрэ кыргыттар, хорсун-хоодуот уолаттар сахалыы мааны таҥаһы симэнэр кэмнэрэ тиийэн-тиксэн кэллэ.
Дьокуускай куорат олохтоохторун уонна ыалдьыттарын Өксөкүлээх Өлөксөй аатынан Норуоттар доҕордооһууларын дьиэтэ бэс ыйын 8 күнүгэр сахалыы сайаҕас, элэккэй, уран тарбахтарыгар талааннаах Анисия Иннокентьевна Федорова – АанИисИйэ “Иэйии утума” диэн быыстапкатын үөрүүлээх аһыллыытыгар ыҥырар!
Анисия Иннокентьевна Мэҥэ-Хаҥалас улууһун I Баатара нэһилиэгин Сыымах бөһүөлэгэр күн сирин көрбүтэ. Кинини кыра эрдэҕиттэн ийэтэ, норуот маастара, иистэнньэҥ — Захарова Анисия Константиновна тигиигэ угуйбута. Аҕата Неустроев Иннокентий Михайлович сылгыһыт буолан кырачаан Анисия кыыс аҕатын дьарыгын иһиттэн-таһыттан көрөн улааппыта. “Ол иһин буолуо ат симэхтэрин олус диэн иэйэн – куойан ис сүрэхпиттэн оһуордаан – мандардаан тигэбин” – диэн Анисия Иннокентьевна кэпсиир. Норуот маастара саҕалаан сахалыы иискэ-оһуорга сүрдээҕин 1989 с. ылсан үлэлиир. Анисия Иннокентьевна араас международнай, евразийскай, республиканскай быыстапкалар кыттааччылара буолар.
Быыстапка арыллыытыгар бэс ыйын 8 күнүгэр күнүс 15:00 чаастанӨксөкүлээх Өлөксөй аатынан норуоттар доҕордоһууларын дьиэтэ ыалдьыттарыгар аанын тэлэччи арыйыа. Кэлиҥ, сылдыҥ, сэргээҥ, көрүҥ-истиҥ!