Бары билэргит курдук , 90 – с сылларга  «Симэх» галерея тэриллэн энтузиаст салайааччыларбыт СӨ, РФ култууратын үтүөлээх үлэһитэ Игнатьева Яна Викторовна уонна  СР искусствотын үтүөлээх деятелэ Гоголев Александр Николаевич – Сатал Уус өҥөлөрүнэн күн бүгүҥҥэ дылы араас таһымнаах тэрээһиннэр ыытылла тураллар. Ол туоһутунан биһиги масстардарбыт үлэлэрин  Москваҕа, Санкт – Петербурга, Иваново, Перьм, Хабаровскай куораттарга, ону таһынан Германияҕа, Францияҕа, Болгарияҕа, Турцияҕа, Монголияҕа, Испанияҕа, Кореяҕа, Японияҕа, Америка штаттарыгар сэргии көрбүттэрэ.

 

 

«Симэх» норуот ускуустубатын Киинэ төрүттэммитэ 25 сылыгар анаан араас кэми кэрэһэлиир хаартыскалар көрдөрүүлэрэ тэрилиннэ.

 

 

Саха сирин Ил Дархана Егор Борисов ыйааҕынан кулун тутар 5 күнэ – Саха Өрөспүүбүлүкэтин норуот маастарын күнүнэн биллэриллэн дьоммут-сэргэбит кэлэр сылга 6 сылын өрө көтөҕүллэн бэлиэтиэҕэ.  Норуот маастарын күнүн чэрчитинэн араас хабааннаах тэрээһиннэр ыытыллан үтүө үгэскэ кубулуйда.

 

 

Саха Сирэ – уус дойдута диэн мээнэҕэ этиллибэт.  Бүтүн Өрөспүүбүлүкэ үрдүнэн 5000 киһи норуот уус – уран оҥоһуктарынан дьарыктанар, ол иһигэр норуот маастара 300 тахса, уус – уран оҥоһуктарга үлэлиир маастар 398 тиийэ үүннэ. Бу буолар биһиги чаҕылхай ситиһиибит!

 

СӨ култуураҕа уонна духуобунай сайдыыга  министерствота,  «Симэх» норуот ускуустубатын национальнай Киинин уонна Өксөкүлээх Өлөксөй аатынан Норуоттар доҕордоһууларын дьиэтин тэрийиитинэн Өрөспүүбүлүкэҕэ аан бастаан «Үгэстэри үйэтитээччилэр»  чороон күрэҕин түстээтибит. Бу тэрээһин  «Симэх» норуот ускуустубатын национальнай киинин тэриллибитэ 25 сылыгар ананна.

 

 

Көрүү үөрүүлээх аһыллыытыгар «Сандал» оҕо үҥкүү ансаамбыла «Сүгүрүйүү үҥкүүтэ» дьүһүйүүнү көрөөччүлэргэ анаата. Уус уран салайааччы Саха Өрөспүүбүлүкэтин үөрэҕириитин туйгуна Сардана Катакова.

 

 

Хомуска дьүһүйүдүлэр Култуура уонна ускуустуба колледжын устудьуоннара. сал.  Саха Өрөспүүбүлүкэтин култууратын  туйгуна Михаил Винокуров.

 

Саха илгэтэ

Айах чороон 

Арчылыыр алгыскынан

Үрүҥ тунаххынан

Үс куппутун өллөйдөөбүт

Үрдүк аналгар сүгүрүйэн

Үгэстэри үйэтитээччилэр

Үмүөрүһэ муһуннубут

Үрдүк сырдык аналгар

Үгүрүк-сүгүрүк махтанабыт!…

 

Уран уус чочуйан оҥорбут, илиитин сылааһынан бигээбит чыпчаал айымнньыларын  кэриэн ымыйалары, алгыстаах айах чорооннору кэрэхсиир көрүүгэ мустубут бар дьоммутугар махталбыт бастыҥын аныыбыт.

 

 

Чороон саха дьонугар үйэлэр тухары утахпытын ханнарбыт, Аар Айыыларга ыһыах ыһар алгыстаах мааны иһиппит буолар.
Бу көрүүгэ Уус-Алдан, Таатта, Чурапчы, Мэҥэ-Хаҥалас, Хаҥалас, Дьокуускай куорат үгэстэри үйэтитэр ыаллара, коллекционердара,  Өрөспүүбүлүкэ биллэр түмэллэрин сэдэх чороонноро эһиги болҕомтоҕутугар көрдөрүүгэ турдулар.

 

 

Эҕэрдэ тыл эттилэр Өксөкүлээх Өлөксөй аатынан норуоттар доҕордоһууларын дьиэтин генеральнай директора, СӨ, РФ култууратын үтүөлээх үлэһитэ – Игнатьева Яна Викторовна.    Гоголев Александр Николаевич – Сатал Уус —  СР искусствотын үтүөлээх деятелэ, СР Уус-уран оҥоһуктарын палататын бэрэсэдээтэлэ,  «Симэх» норуот ускуутубатын национальнай  Киинин салайааччыта чороон туһунан бэйэтин хоһоонун иэйэн – куойан туран аахта..

 

 

Чороон ойуута-мандара барыта кэпсээннээх дииллэр. Хас биирдии сахалыы иһиттэрэ хатыламматтар.  Ыраас, нарын иэйиилээх дорҕооннорго холбоһон, өбүгэлэрбит ыра санааларын кэпсииргэ, умнуллан эрэр сэһэннэрин сөргүтэргэ дылылар…..  Сырдык санаалаах, инникигэ дьулуурдаах, эйэҕэс эйгэлээх өбүгэлэрбит үтүө үгэстэрин утумнаан иһиэҕиҥ, сөргүтүөҕүҥ, талааннарыгар сүгүрүйүөҕүҥ!

 

Сыралыма