Урукку кэмҥэ үлэлээбит Саха Өрөспүүбүлүкэтин Ил Дархана Е.А. Борисов тыа сирин олохтоохторугар, тыа сирин кэлимник сайыннарыыга болҕомтотун күүскэ уурбута, оннооҕор болдьоҕун  уһатан биэрбитэ. Ити 2014-2018 сс.

Ол санааттан, тыа сирин  айар талааннаахтарын мунньан «Ыллаа-туой, тыам сирэ!» — диэн бырайыак тэриллибитэ. Тыа сирин айар талааннаахтарын кытта үлэлэһэргэ күүс-көмө буолбуттара   СӨ култууратын үтүөлээх үлэһиттэрэ Саргылана Саввична Адамова, Розалия Ефимовна Колосова, Өксөкүлээх Өлөксөй аатынан норуоттар доҕордоһууларын дьиэтин генеральнай директордара Яна Викторовна Игнатьева, Антонида Николаевна Корякина.

Этэргэ дылы,  хас биирдии  киһи кыракый дойдулаах буолар. Киһи төрөөбүт дойдутун сыаналыыр, таптыыр. Ханна да олохсуйбуппутун иһин син биир төрөөбүт дойдубутун  ахтабыт, саныыбыт, таптыыбыт.  

Дьэ,  ол иһин куоракка олохсуйбут дьоҥҥо анаан быйыл Өксөкүлээх Өлөксөй аатынан норуоттар доҕордоһууларын дьиэтэ  «Ыллаа-туой, тыам сирэ!» үгэс быһыытынан 12 төгүлүн тэрийэн ыытта. Быйылгы тэрээһин СӨ норуодунай артыыһа, норуот таптыыр ырыа айааччыта, ырыаһыта Анастасия   Николаевна Варламова  төрөөбүтэ  75 үбүлүөйдээх сылын түмүктүүр сылыгар ананна. Ааспыт кэм ахтылҕанын санатар  кэнсиэри Мэҥэ-Хаҥалас  култуураҕа уонна духуобунаска сайдыы салаатын кытта бииргэ холбоон тэрийдибит.

«Ыллаа-туой, тыам сирэ!» кэнсиэргэ кимнээх кыттыыны ыллылар диир буоллаххытына  Бэдьимэҕэ ыытыллыбыт «Төннө туруоҕум алааспар» Эдьиий Настаа төрөөбүтэ 75 сылынан ырыа күөн — күрэс  Кылаан кыайыылааҕа Дьаҥхаадыттан төрүттээх Айыына Харабаева. Лауреаттар дипломаннар  Мэҥэттэн төрүттээхтэр Михаил Санников, Елена Александрова, Ульяна  Ефремова, Ия Сёкова, Чурапчыттан Валерий Корякин, Сарыал Сивцев, Рустам Слепцов, Валерий Ноев уонна Аркадий Алексеев, Анастасия Варламова, Александр Дмитриев-Чүмэчи, Валерий Кузьмин ааттарыгар ыытыллыбыт ырыа күрэстэрин Кылаан  кыайыылаҕа, Норуоттар икки ардыларынааҕы ырыа күрэстэрин кыайыылааҕа Терентий Егоров. Бэдьимэттэн — «Сырдык сүүрээн» Майаттан «Сардаана», Хаптаҕайтан «Сандаара», Чурапчыттан  «Алаас кыргыттара»   дьахталлар ансаамбыллара. Быйыл Сыымахха ыытыллыбыт урукку Герой Попов сопхуос отделениеларын иһинэн , Эдьиий Настаа ырыаларыгар күөн-күрэс  Кылаан кыайыылааҕа «Дуолан» эр дьон ансаамбыла.  Табаҕаттан «Төлөн» — эр дьон народнай ансаамбыла. Ону таһынан 2022 сыллаахха, Эдьиий Настаа ырыаларыгар бырайыак культура эйгэтин көҕүлээһин фондатын гранын өйөбүлүн ылан үп-харчы көрүллэн салгыы ыытыллыбыт күөн-күрэс Кылаан  кыайыылааҕа, «Туой хайа» курдук ырыа түһүлгэтин чыпчаал аатын хаһаайката, Анастасия Варламова, Аркадий Алексеев аатынан ырыа күрэстэрин кыайыылааҕа, ырыа айааччы   Инна Донская — Дайаана, Мария Григорьева — Маайа,  Нам улууһа. 2018 с. Сыымахха Эдьиий Настаа 70 сааһыгар анаммыт «Кэрэни кэрэхсээри айыллыбытым» өрөспүүбүлүкэтээҕи мелодист дьахталлар ырыа күөн — күрэһин муҥутуур кыайыылааҕа  «Ыллаа-туой, тыам сирэ!» кэнсиэргэ үрдүк таһымнаахтык кытыннылар.

Бу кэнсиэргэ көрөөччүлэр ордук Эдьиий Настаа уостан түспэт уонна ылламматах ырыаларын астына-дуоһуйа иһиттилэр. Кэнсиэр кыттылаахтарын Өрөспүүбүлүкэҕэ биллэр баянистар доҕуһуоллаатылар. Ол курдук, Эдьиий Настаа бастакы аккомпаниатора Владимир Кузьмин, СӨ ырыа айааччыларын союһун эппиэттээх сэкиритээрэ  Степан Васильев, эдэр баянист Данил Алексеев, СӨ баянистарын, гармонистарын уонна аккордеонистарын сойууһун чилиэнэ Георгий Попов уонна Николай Кириллин. Дьоро киэһэни иилээн саҕалаан ыытта СӨ ырыа айааччыларын сойууһун уонна Мэҥэ-Хаҥалас улууһун «Дьүрүлгэн» ырыа айааччыларын түмсүүтүн чилиэнэ, СӨ култууратын туйгуна, Эдьиий Настаа бастыҥ үөрэнээччитэ, музыкант, мелодист, айар талааннаах Дмитрий Санников. СӨ норуодунай артыыһа, норуот таптыыр ырыа айааччыта, ырыаһыта Анастасия   Николаевна Варламова  төрөөбүтэ  75 үбүлүөйдээх кэнсиэрин бэлэмнээтилэр Георгий Попов, Фекла Попова. Режиссер Саргылана Адамова – Алтан Кыыс, бырайыак автора Любовь Шишигина. Норуот уус–уран самодеятельноһын кыттыылаахтарыгар бэйэлэрин кылааттарын киллэрсибиттэрин, кэккэ ситиһиилэрин иһин Саха Өрөспүүбүлүкэтин култуураҕа уонна духуобунаска министерствотын, тыа сирин кытта үлэлэһэр Республикатааҕы норуот айымньытын бирикээһинэн Георгий Попов уонна Дмитрий Санников бочуоттаах знагынан наҕараадаланнылар. Дьоһун бэлиэлэри Мэҥэ-Хаҥалас култуураҕа уонна духуобунай сайдыыга салалтатын салайааччыта Анна Руслановна Исакова туттарда.

СӨ норуодунй артыыһа, СӨ култууратын үтүөлээх үлэһитэ, саха норуотугар умнуллубат алаас сыттаах, дьэдьэн амтаннаах ырыалары айан хаалларбыт Анастасия Николаевна Варламова-Эдьиий Настаа сүгүрүйээччилэрэ!  Эдьиий Настаа саха тыллаах, сахалыы санаалаах, сахалыы куттаах саха омук баарын тухары аата үйэлэртэн — үйэлэргэ ааттана, ырыалара ыллана туруохтара.

Дьэ, онон күндү көрөөччүлэрбит кэлэн илэ харахтарынан  көрөн ахтылҕаннарын таһааран дойдубут мүөттээх салгынын иҥэринэн, күүс–уох ылан тарҕастылар.