Дьокуускай куорат дьоллоох туонатыгар Мэҥэ – Хаҥалас күннэрин, үгэс буолбут үбүлүөйдээх култуура уонна спорт 60-с төгүлүн ыытыллар «Көлүөнэни ситимниир, норуоту түмэр эстафетаҕа эҕэрдэ» чэрчитинэн «Оһуор – Мандар түһүлгэтэ» — диэн улуус уран тарбахтаахтарын, уустарын, айар талааннаахтарын быыстапкатыгар элбэх киһи муһунна.

 

 

«Симэх» норуот ускуустубатын Киинин салайааччыта Саха Өрөспүүбүлүкэтин ускуустубатын үтүөлээх деятеля Александр Николаевич Гоголев Төҥүлү нэһилиэгин тимир ууһугар Устин Николаевич Борисовка «Саха Өрөспүүбүлүкэтин  норуотун маастара» үрдүк ааты иҥэрдэ түөскэ кэтиллэр бэлиэни уонна дастабарыанньаны туттарда.

 

 

Туймаада олохтоохторо, ыалдьыттара айар талааннаахтар түһүлгэлэрин, кэрэ эйгэтин алгыстаах аанын арыйан, сиэдэрэй, оһуордаан – мандардаан, ойуулаан – дьүһүннээн, чочуйан оҥорон таһаарбыт оҥоһуктарын сэргии көрдүлэр.Улуус 31 нэһилиэгиттэн бастыҥнар үлэлэрэ туруоруллан бииртэн биир тупсаҕай оҥоһуктары көрө кэлбит дьон  санаалара көтөҕөлүннэ.

 

 

Бу быыстапканы туоруорбут Олонхо дьиэтин кэлэктиибигэр директор Евдокия Николаевна Ивановаҕа муҥура суох махтанабыт. Инникитин да өссө үрдүк таһымҥа тахсалларыгар, саҥаттан саҥа ситиһиилэри.

 

 

Айыҥ – тутуҥ,

Үөрүҥ – көтүҥ,

Санааҕытын ситэриҥ,

Баҕаҕытын батыһыҥ,

Үөрүүттэн үөрүү элбээтин,

Дьолтон дьол үөскээтин,

Итэҕэйиҥ эрэлгитигэр,

Эрэниҥ итэҕэлгитигэр.