Норуот тылынан уус-уран айымньытын умнулла быһыытыйбыт көрүҥнэрин сөргүтэр сыаллаах-соруктаах фестивалы А.Е.Кулаковскай аатынан норуоттар доҕордоһууларын дьиэтин информация-маркетинг салаата иилээн-саҕалаан үрдүк таһымнаахтык, улахан тэрээһинээхтик, киэҥ далааһыннаахтык ыытта.

 

Бу күн өрөспүүбүлүкэ араас муннуктарыттан, ыраахтан-чугастан, соҕурууттан-хотуттан мустубут 134 оҕо, улахан дьон көрү-нары көҕүлүттэн туттулар. Устар ууну сомоҕолуур уран тыллаахтар көрдөөх кэпсээннэри, чабырҕахтары, монологтары, үгэлэри о.д.а. ааҕан, кэпсээн истээччи, көрөөччү билиниитин, биһирэбилин ылыахтарын ыллылар.

 

 

“Көр-күлүү, сатира жанрдара урут да, билигин да чэпчэкитэ суох көрүҥҥэ киирсэллэр. Норуот тылынан уус-уран айымньытын бу көрүҥнэригэр ылсыбыт киһи тылы-өһү, туттууну-хаптыыны, сирэйи туттан көрдөрүүнү, артыыстааһыны кыайа тутуохтаах. Бүгүҥҥү фестивалга кэлбиттэр чаҕылхай талааннааххытын итэҕэттигит», — диэн Дьүүллүүр Сүбэ бэрэссэдээтэлэ прозаик, өрөспүүбүлүкэ үтүөлээх артыыһа Елена Слепцова – Куорсуннаах санаатын үллэһиннэ.

 

 

Көр-күлүү дьоро киэһэтин “Эхо столицы” хаһыат (дириэктэр Александр Прокопьев) өйөөн, “Виктория” миэбэл-салонуттан кыттааччыларга сертификаттары туттарда. Хаҥалас улууһун Өктөмнөөҕү норуот театра (уус-уран салайааччы Зоя Аржакова), Мэҥэ Хаҥалас «Бэтиэхэлээх Балыктаахтар» (салайааччы Вера Шишигина), Бүлүү улууһун Тыымпы нэһилиэгин гимназия«Күлбэйэ» коллектива (салайааччы Сардана Боронова) хаһыат эрэдээксийэтин биһирэбил бириэмийэтин ылан сүргэлэрэ көтөҕүлүннэ.

 

Күннээҕи олох кыһалҕаларыттан аралдьытар, тутахсыйбыт, саппаҕырбыт санааны салгын хоту сайҕыыр көр-күлүү дьоро күнүн тэрийэр, дьоҕурдаахтар талааннара алмаас кырыытыны араас өҥүнэн дьиримнии оонньууругар акылааты айар бырайыак ааптарынан Саха Өрөспүүбүлүкэтин туйгуна, А.Е.Кулаковскай аатынан норуоттар доҕордоһууларын дьиэтин биир туруу үлэһитэЛюбовь Шишигина буоларын эбэн этэр оруннаах.

 

 

Үөрэх управлениета оҕолор доруобуйаларын чэбдигирдэр “Бэс Чагдаҕа” 9 путевканы Нам улууһун «Дьырылыатта» коллективыгар (салайааччы Елена Иванова) туттарда. Биир итинник путевканы Хаҥалас Өктөмүттэн Ангелина Поповаҕа биэрдилэр.

 

 

Оҕолорго чабырҕаҕы ааҕыыга 1-кы степеннээх лауреат аатын Нам улууһун “Дьырылыатта” фольклорнай бөлөҕө ылла. Үгэни ааҕыыга Хаҥалас Өктөмүттэн кыттыбыт Ангелина Поповаэмиэ маннык наҕараадаҕа тигистэ. Монологу ааҕыыга Бүлүү Тыымпы сэлиэнньэтин гимназиятын үөрэнээччитэ Иван Константинов тэҥнээҕин булбата. “Күлбэйэ” оҕо театра оонньообут сценката бастыҥынан ааттанна.

 

 

Улахан дьон ортотугар чабырҕахха Мэҥэ Хаҥалас Хаптагай нэһилиэгиттэн кыттыбыттар инники кирбиигэ таҕыстылар. Туойууга Дьокуускайтан Екатерина Новикова, Иннокентий Птицынкүрэстэһээччилэрин куоһардылар. Үгэни ааҕыыга Амма Абаҕатыттан Галина Захаровабастыҥынан ааттанна. Монологу толорууга Дьокуускайтан Светлана Куличкина барыларыттан ордон, инники күөҥҥэ таҕыста. Өктөм народнай театра оонньообут сценкатын иһин 1-кы степеннээх лауреат буолла.

 

 

Кыайыылаахтары таһынан “Хомоҕой тыл хоһууна” үрдүк аат аат Анаабыр Сааскылаахтааҕы народнай театра ылла. “Бастыҥ ааптарскай холонуу”  аат Мэҥэ Хаҥалас Хаптаҕайыттан кыттыбыт Елена Егороваҕа иҥэрилиннэ. “Көр-күлүү оруолун чаҕылхайдык толоруу” аат Хаҥалас Өктөмүттэн Александр Готовцевка тигистэ.

 

 

“Чабырҕах — үйэлээх үгэспит” – ааты Дьокуускай 26 №-дээх оскуолатын үөрэнээччитэ Михаил Куличкин ылла. “Түгэхтээх үгэ” аат Мэҥэ Хаҥалас Хаптаҕайыттан кыттыбыт Солодников Сашаҕаананна. “Бастыҥ сценическай таҥас” ааты — Үөһээ Бүлүү Балаҕаннааҕыттан кэлбит “Балаҕаннаах бэтиэхэлэрэ” ыллылар.

 

ААПТАР: Елена Обутова