Ахсынньы 1 күнүгэр Бөкөҕө, нэһилиэк общественноһын, дьаһалтатын өйөбүлүнэн, сынньалаҥ киин үлэһиттэрин көҕүлээһиннэринэн көстүбэт фронт үлэһиттэригэр, техүлэһиттэргэ аналлаах “Чэгиэн чэбдик хотун” диэн ураты конкурс иккис төгүлүн ыытылынна.Бу сырыыга кыттааччы ахсаана элбэҕинэн уонна эр дьон кыттыыны ылбытыттан тэрээһин интэриэстээҕин, кэскиллээҕин бигэргэттэ. Ол курдук барыта 14 киһи, ол иһигэр 2 эр киһи Бэдьимэттэн, Хараттан, Дьокуускайтан, Табаҕаттан, Майаттан, Лоомтукаттан, Чүүйэттэн 6 түһүмэххэ күөн көрүстүлэр. Үгэс быһыытынан 1 түһүмэххэ конкурсаннар кимтэн кииннээхтэрин, хантан хааннаахтарын блиһиннэрдилэр. Саха көмүлүөк оһоҕун иннигэр олордо да олоҥхоһут, оҕуһун мииннэ да ырыаһыт дииллэринии, күрэхтэһээччилэрбит 2 түһүмэххэ бииртэн биир талааннарын көрдөрөн көрөөччүлэр, дьүүллүр сүбэ биһирэбиллэрин ыллылар. 3 түһүмэххэ аны көр-күлүү жанрыгар холонон көрдүлэр.Араас көрдөөҕү, дьиибэлээҕи толкуйдааннар көрөөччүлэри “быара суох” ыыттылар.4 түһүмэххэ таҥнан-симэнэн, атрибуттарыгар тиийэ киэргэнэн араас стиллээх таҥаһы-сабы ытыс тыаһыгар доҕуһуоллатан музыка тыаһыгар уйдаран хааман наскылдьыйан көрдөрдүлэр, урукку сыллар муодаларын илэ-бааччы эргиттилэр. Хаһаайка ааттааҕын, асчыт бастыҥын туоһулаан 5 түһүмэххэ астаан аҕалбыт бүлүүдэлэрин билиһиннэрдилэр, кэлбит дьоҥҥо амсаттылар. Итиэннэ бүтэһик түһүмэҕинэн сахалыы таҥас маанытын, ситэритин билиһиннэрдилэр.

Дьүүллүүр сүбэ састаабыгар 5 киһи үлэлээтэ, ол иһигэр олохтох дьаһалта баһылыга И.И.Новгородов, Догдоҥо оскуолатын директора И.С.Филиппов, улуустааҕы культура управлениетыттан Э.М.Павлова, олохтоох дьаһалта баһылыгын солбуйааччы И.К.Павлова, дьаһалта специалиһа А.А.Турчина үлэлээтилэр.

Күөн күрэс түмүгүнэн 3-с бочуоттаах миэстэни Майатааҕы Д.Ходулов аатынан норуот айымньытын киинин үлэһитэ Варвара Шишигина, 2-с миэстэни Бөкө оскуолатын эдэр үлэһитэ Алла Иванова, 1-кы миэстэни Майаттан “Майа-фирма” үлэһитэ Светлана Охлопкова ыллылар. Онтон саамай муҥур кыайыылааҕынан Чүүйэттэн, В.В.Скрябин аатынан оскуола повара Дария Еремеева Гран При аатын сүктэ. Кыайыылаахтар спонсордар олохтообут сыаналаах бириистэрин туттулар. Кыттыыны ылбыт конкурсаннар бары анал номинацияҕа тиксэн анал дипломнары, сэмэй бэлэхтэри туттулар. Культура үлэһиттэрин профсоюһун председателэ Э.М.Павлова профсоюз харчынан бирииһин В.Е.Шишигинаҕа туттарда.

Бу күөн күрэскэ бириистэринэн көмөлөспүт олохтоох дьаһалтаҕа (баһ. И.И.Новгородов), Д.Ходулов аатынан театрга, дьиэ кэргэни, ыччаты кытары үлэлиир, пенсионнай, ветеринарнай управлениеларыгар, меценат М.М.Шипошинаҕа, ЖКХ салалтатыгар, коллекционердар салайааччыларыгар Н.И.Никанороваҕа, “Талер” маҕаһыыҥҥа (сал.Д.И.Катакинов), ИП Н.Н.Старостиҥҥа, МУПК тэрилтэтигэр (сал. И.М.Скрябин), “Далбар” маҕаһыын (сал. А.В.Новгородова), ООО “Акватранс” (сал. М.М.Степанов), Майа сэл. дьахтар комитетын салайааччытыгар Е.П.Баишева, культура үлэһиттэрин профсоюһугар (предс. Э.М.Павлова), Догдоҥо орто оскуолатыгар (дир. И.С.Филиппов), депутат И.Г.Пивоваровка, “Туллукчаан” оҕо саадыгар (сал.А.В.Морозова) тэрйээччилэр уонна кыттааччылар махталларын биллэрэллэр.
Маннык сэргэх конкурсу саҕалаабыт Бөкөлөр үгэс быһыытынан былааннаан ыытыыны салҕааһын, аныгыс күрэхтэһии балаһыанньатын эр дьону кытыннарар сыаллаах уларытан, элбэх кыттааччыттан сайаапка киирдэҕинэ бастакы туурдаан ыытар соруктары туруордулар.

Эмма ПАВЛОВА, культура управлениетын методиһа