Айар кукка умсугуйа Просмотров: 1132
Бу орто дойдуга саха киһитэ барахсан айыыларыттан айдарыллан, айылҕаттан бэриллибит иитиэхтии сылдьыбыт айар, тутар талааннара аһыллан күн сирин үтүөтүн билэр. Кэрэ, дьикти айылҕалаах, үгүс үтүө талааннаах дьоннордоох Сунтаар улууһуттан төрүттээх Тамара уонна Александр Игнатьевтар айар кукка умсугуйа бэйэлэрин дьиэ – кэргэттэрин быыстапкатын көрөөччү дьүүлүгэр таһаардылар. Кинилэр былыр – былыргаттан илдьэ сылдьыбыт моһуоҥҥа олоҕуран уустаан – ураннаан тигиллибит ат толору киэргэлин, симэҕин быыстапкаҕа туруорбуттарын саха киһитин дууһатын таарыйар сөҕүмэр үлэни сэргии көрдүбүт. Маны таһынан туостан, мастан оҥоһуллубут ыһыах иһитин – хомуоһун араас көрүҥэ быыстапкаҕа турда.
Бу кэрэ, үтүө күҥҥэ алгыс тыл бастыҥын анаатылар Өксөкүлээх Өлөксөй аатынан норуоттар доҕордоһууларын дьиэтин генеральнай директора Саха Өрөспүүбүлүкэтин уонна Арассыыйа култууратын үтүөлээх үлэһитэ Я.В. Игнатьева, Уус – Алдан улууһун «Бээрийэ» нэһилиэгин «Арчы» түмсүүтүн салайааччыта, Саха Өрөспүүбүлүкэтин норуотун маастара В. Т. Васильева, муосчут Саха Өрөспүүбүлүкэтин норуодунай худуоһунньуга Ф.И. Марков, муосчут, скульптор Саха Өрөспүүбүлүкэтин норуодунай худуоһунньуга М.М. Павлов, этнограф В.Ф.Яковлев, Дьокуускай куорат култуураҕа салаатын солбуйааччыта, Саха Өрөспүүбүлүкэтин култууратын үтүөлээх үлэһитэ Л.К. Андреева, С.А. Зверев – Кыыл уола аатынан музей директора Д.К.Осипов уо.д.а.