“Көҕүөр таабырына” Чурапчыга арылынна Просмотров: 1193
Чурапчы улууһугар “Айылгы” КК норуодунай художник Афанасий Петрович Мунхалов картиннай галереятыгар тохсунньу ый 21 кунуттэн ыалдьыттыыр поэт, художник, СР искусствотын үтүөлээх деятелэ, «Гражданскай килбиэн” знак хаһаайына Александр Гоголев-Сатал Уус “Көҕүөр таабырына” диэн айар үлэтин түмүлэ. Тэрийээччилэринэн Чурапчы улууһун культуратын салаата, “Айылгы” КК иһинэн үлэлиир норуодунай художник Афанасий Петрович Мунхалов картиннай галереята, “Симэх” — республикатааҕы норуот уус-уран айымньытын киинэ.
Кинини арыаллаан кэлбиттэрэ А.Е.Кулаковскай аатынан Норуоттар доҕордоһууларын дьиэтин ген. директора РФ культуратын үтүөлээх үлэһитэ, искусствовед Яна Викторовна Игнатьева, СР үтүөлээх артыыһа Сергей Петрович Попов, поэт, прозаик, критик, Иван Гоголев аатынан премия лауреата, “Күрүлгэн”журнал редактора Афанасий Гаврильевич Гуринов-Арчылан, журналист-фотограф Бурцев Александр Иннокентьевич, Республика норуотун маастара Азияна Харлампьева, “Симэх” галерея сүрүн үлэһитэ Виктор Викторович Игнатьев. Бу күн улууска литература сылын түмүктээһинэн сибээстээн суруйааччылар С.Попов-Тумат, Н.Егоров — Тумарча, Н.Винокуров – Урсун, П.Федоров — Сомоҕо кыттыыны ылбыттара, тэрээһин үрдүк таһымҥа ааспыта. Тохсунньу, олунньу ыйдарга саҥа сыл саҕаланыытын быһыытынан элбэх тэрээһин мунньахтар, форумнар, түмсүүлэр, төгүрүк остуоллар буола туралларынан быыстапкаҕа сылдьыы элбэх уонна олохтоох көрөөччүлэр даҕаны маннык тэрээһиннэри көтүппэккэ сылдьалларын бэлиэтиир наада. Улууска 2016 с. музей сылынан, үөрэх эйгэтигэр эбии үэрэхтээһин сыла биллэриллибитинэн, бу түмүлтэн киһи сомсон ылара элбэх курдук буолан таҕыста. Художник үлэтин эйгэтин туһунан олохтоох “Саҥа олох” хаһыаттан ааҕыахха сөп. Ону таһынан көрөөччүлэр санааларыттан быһа тардан суруйдахха:
“…Киһини элбэххэ толкуйдатар интириэһинэй быыстапка эбит”
“…Кырдьык да көбүөр курдук дьикти ойуулар оҥоһуллубуттар»
“…Киһи уйулҕатын хамсатар, таарыйар дьүһүннэр түспүттэр.. »
«…Бу быыстапкаттан билбэтэхпин биллим, көрбөтөхпүн көрдүм», онон бу үлэлэри кытта билсиһии, көрүү, сэҥэрии олунньу 14 күнүгэр диэри салҕанар.
В.Д.Пинигина
