Өбүгэ быстыбат ситимэ Просмотров: 1223
Бу күннэргэ олоҥхо нэдиэлэтин чэрчитинэн Майаҕас бөһүөлэгэр Уус-Алдан улууһугар Уус-Алдан улууһун култуураҕа салаата, «Хоро нэһилиэгэ» МТ уонна Майаҕастааҕы норуот айымньытын дьиэтэ тэрийиитинэн «Өбүгэ быстыба ситимэ» — диэн норуот тылынан уус – уран айымньытын толорууга (тойук, дэгэрэҥ ырыаны толорууга, чабырҕахха) күөн-күрэс ытылынна.
Күрэх сыала – соруга: Өбүгэ саҕаттан илдьэ кэлбит кылыһахтаах тойукпутун, чобуо-чоргуй чабырҕахпытын, сахалыы дэгэрэҥ ырыабытын сөргүтүү, толоруу маастарыстыбатын таһымын үрдэтии, айар дьоҕуру сайыннарыы, саҥа чаҕылхай талааннары арыйыы буолар. Барыта 19 кыттааччы Майаҕас, Тумул, Бэйдиҥэ, Тулуна, Чараҥ, Найахы, Мүрү нэһилиэгиттэн кэлэн кытыннылар. Дьүүллүүр сүбэҕэ Өксөкүлээх Өлөксөй аатынан норуоттар доҕордоһууларын дьиэтин информационнай-маркетинговай салаа салайааччыта Шишигина Л.Е., Бороҕоннооҕу ИМЦ испэсэлииһэ Алексеева М.К., Уус-Алдан улууһун култуурунай – маассабай салаа салайааччыта Бурцев А.Н. үлэлээтилэр. Күөн-күрэҕи Уус-Алдан улууһун култуурунай – маассабай салаа испэсэлииһэ Анна Федорова кыайа-хото ыытта.
Уус – Алдан култуураҕа салаата призовой фондаҕа бэрткэ үлэлэспитэр. Көрүҥнэринэн бастакы үрдэлгэ 10.000, иккис үрдэлгэ 6000, үһүс үрдэлгэ 4000 уонна анал ааттарга 2000 харчынан бириэмийэ. Ол куҥрдук тойукка анал ааттар иҥэрилиннэ «Утумнаах тойуксут» — Иван Бурцев (Уһун – Күөл), «Дорҕоон тойуктаах» — Кыыдаана Петухова (Тулуна), «Кылыһахтаах тойук» — Александра Илистярова (Майаҕас). Бастакы үрдэл – Антонина Лугинова (Бэйдиҥэ), иккис үрдэл — Василий Новоприезжай (Тумул), үһүс үрдэл– Мария Егорова (Мүрү). Дэгэрэҥ ырыаҕа «Ымыылаах ырыаһыт» — Мария Говорова (Бэйдиҥэ), «Киристэпиэр кэрэхсибилэ» — Галина Ущницкая (Майаҕас), «Дэгэлдьитэр дэгэрэҥ» — Иван Тордуянов (Мүрү). Бастакы үрдэл – Василий Новоприезжай (Тумул), иккис үрдэл – Анатолий Копырин (Чараҥ), үһүс үрдэл– Ньургуяна Никитина (Найахы).
Бу курдук, тыа дьоно бэйэлэрин талааннарын дьоҥҥо–сэргэҕэ иһитиннэрэн, көрдөрөн бэрт сэргэхтик олороллор.