Сэтинньи 25 күнүттэн ахсынньы 5 күнүгэр дылы Сахабыт сиригэр Олоҥхо Декадата биллэриллэн турар. Декада чэрчитинэн араас Олоҥхоҕо сыһыаннаах тэриллиилэр буоллулар. Оннук курдук бүгүн, ахсынньы 2 күнүгэр, Өксөкүлээх Өлөксөй аатынан норуоттар доҕордоһууларын Дьиэтигэр Саха Өрөспүүбүлүкэтин үөрэҕириитин министиэристибэтэ, Саха Өрөспүүбүлүкэтин национальнай оскуолаларын чинчийэр институт, М.К.Аммосов аатынан ХИФУ Педагогическай институт уонна Этнокултуурнай үөрэхтээһин А.Д.Семенова аатынан учебнай-научнай лаборатория тэрийиитинэн “Олоҥхо педагогиката – үөрэх-иитии систиэмэтигэр” диэн научнай-практическай кэмпириэнсийэ үлэтин саҕалаата.

Кэмпириэнсийэни Саха Өрөспүүбүлүкэтин Олоҥхо 10 сылын тэрийэр национальнай комитет бэрэсэдээтэлэ Александр Николаевич Жирков уонна Ил Түмэн наукаҕа, үөрэхтээһиҥҥэ, култуураҕа, иһитиннэрэр, көрдөрөр общественнай тэрилтэлэр бастайааннай комитет бэрэсэдээтэлэ Антонина Афанасьевна Григорьева эҕэрдэ тылларынан саҕаланна. Бүгүҥҥү кэмпириэнсийэҕэ Саха Сирин араас муннуктарыттан үөрэхтээһин тэрилтэлэрин үлэһиттэрэ бэйэлэрин үлэлэрин, бырайыактарын көмүскээри муһуннулар.

Кэмпириэнсийэ 3 түһүлгэннэн барыа:

1 түһүлгэ: Олоҥхо педагогиката – оскуола иннинээҕи үөрэхтээһин систиэмэтигэр.

2 түһүлгэ: Олоҥхо педагогиката – уопсай үөрэхтээһин систиэмэтигэр.

3 түһүлгэ: Олонхо педагогиката идэни биэрэр үөрэх систиэмэтигэр.